Rekord në Everest, 80-vjeçari ngjit 8848 m të malit më të lartë!

Rekord për Yuichiro Miura, i cili edhe pse 80 vjeç, ka mundur të ngjitet në lartësinë prej 8848 të malit më të lartë në botë, Everestit. Japonezi sfidoi ngricën dhe pengesat e shumta të Himalajave, duke hyrë në histori si alpinisti më i vjetër që arrin majën më të lartë. "Mbërrita më në fund, ia dola mbanë", komunikoi alpinisti japoneze përmes një telefonate të bërë në adresë të ekipit të tij, që e mbështeste nga Tokio.

Miura nuk është i ri në sipërmarrje të tilla: më 22 mars 2003 kishte thyer rekordin, me ngjitjen në moshën 70-vjeçare. Mirëpo, rekordi i tij i ri mund të zgjasë vetëm një javë, sepse nepalezi Min Bahadur Sherchan, 81 vjeç, do të tentojë të njëjtin mision gjatë javës së ardhshme.