Të jesh sensuale në katër hapa!

Nuk ka nevojë të lexoni manuale për këtë, janë gjëra të thjeshta që ndoshta i dinit por nuk u keni kushtuar rëndësi. Bukuria e një gruaje nuk qëndron vetëm në sytë e atij që e sheh, mbi të gjitha është në mendimin që ka ajo për veten

Krahasimi me yjet e televizionit ose me ndonjë vajzë të bukur që e hasni në rrugë, nuk i bën mirë vetëvlerësimit. Dhe jo gjithmonë shërbejnë përmasat e perfeksionit 90-60-90, për t’u ndjerë sensuale. Çdo grua ka sharmin e saj. Mjafton të besojë se e ka edhe pse ndoshta të fshehur, e mbi të gjitha duhet të dijë ta shfaqë. Duajeni trupin tuaj, vetëm kështu mund të jeni të dëshiruara edhe nga të tjerët. Megjithatë ka disa truke të vogla që mund t’ju ndihmojnë të tërhiqni vëmendjen mbi veten dhe të reflektoni ashtu siç dëshironi.

Qëndrimi

Mos harroni asnjëherë të mbani shpinën drejt dhe të keni një ecje të bukur me barkun brenda e gjoksin përpara. Ky është hapi i parë thelbësor për t’u dukur, por mbi të gjitha për t’u ndjerë në lartësinë e të tjerave. Të reflektosh siguri edhe në mënyrën se si ecën transmeton elegancë dhe sensualitet.

Mjaft me krahasimet

Ka gra që kanë një fizik për t’u admiruar, duken si rimishërimi i perfeksionit dhe kur kalojnë ato, burrat kthehen për t’i parë me sytë që flasin vetë. Por, për çfarë ju shërben që të bëni krahasime me këto zonjusha të bukura? Jo vetëm që nuk ju ndihmon, por shkakton trishtim dhe ju shton pasiguritë. Perfeksioni nuk është e vetmja përmasë e sensualitetit: punoni me veten tuaj, jepjuni fund krahasimeve dhe do të shihni rezultatet të vijnë vetë.

Pse nuk kënaqeni kurrë?

Një grua nuk është kurrë e kënaqur dhe çdo rast është i mirë për të gjetur të metat te vetja e saj. Nëse është e shkurtër dëshiron të ketë të paktën 10 cm më shumë, nëse është e gjatë ankohet se e ka të vështirë të shoqërohet me meshkuj, sepse i arrijnë gjer te supi. Po flokët…? Një mallkim i vërtetë: Ose nuk janë mirë sepse janë shumë kaçurrela, ose janë tepër të drejta për shijet e saj. Kur ndonjëra ka forma që bien në sy, dëshiron të jetë më elegante dhe kur janë elegante dëshirojnë të mos duken aq “dërrasë”, sepse meshkujt i adhurojnë format. Një mani së cilës i duhet dhënë fund: çdo gua ka pika force që duhet me patjetër t’i nxjerrë në pah dhe mbi të gjitha ta shohë veten me sy më pak kritik e mundësisht pa lupë.

Lërini veshjet të flasin për ju

Një nga elementet që mund të vlerësojë (ose zhvlerësojë) trupin e një femre është pa dyshim veshja. Mjafton të gjesh stilin që të shkon më shumë dhe loja mbaroi. Sigurisht duhet të shkojë në të njëjtën linjë me prakticitetin dhe rehatinë. Mos harroni, duhet një kopsë më shumë e zbërthyer për të dhuruar sensualitet. Xhinset mund të jenë mirë, por nuk duhen përdorur çdo ditë si uniformë. Përpiquni të ndryshoni diçka të vogël në veshjen tuaj dhe zgjidhni atë që nxjerr në pah anën femërore te ju. Këtu nuk e kemi fjalën vetëm për veshjet e dukshme për sytë e të tjerëve, por edhe për ato intimet që i ndihmojnë format të duken më mirë. Kaq pak mjafton për t’u dukur e bukur dhe sensuale në “360 gradë” /ikub/