Rama paraqet programin e qeverisë, Berisha: Na shpalli luftë!!

Kryeministri prezanton programin pa praninë e opozitës. Vetëm Dashamir Shehi i LZHK dhe deputeti o PDIU-së Tahir Muhedini vendosën të mos largohen nga salla.

Kryeministri i dekretuar, Edi Rama, prezantoi përpara Kuvendit programin e qeverisë 2013-2017 të koalicionit "Aleanca për Shqipërinë Europiane". “Opozita do të jetë pjesë e vendimeve të këtij Kuvendi. Ne do të dialogojmë dhe do të udhëheqim. Opozitarët se do të gëzojnë respektin që socialistët nuk e patën kurrë”, tha Rama gjatë fjalës së tij. Ai u tentua të ndërpritet nga ligjvënësit demokratë, të cilët filluan ta kundërshtonin duke krijuar zhurmë në sallë. Mirëpo pas kësaj deklarate, opozita vendosi të bojkotojë prezantimin e programit qeverisës nga Rama, ndërkohë që ish-kryeministri Berisha në një prononcim për mediat e cilësoi fjalimin e Ramës ‘paranojak dhe hakmarrës’. “Nuk kishte hapësirë për të ndjekur ligjeratën paranojave, banale të një piktori dështak që sot flet në emër të qeverisë – deklaroi Berisha -. I rikujtoj zotërisë se sot janë dy data. 11 shtatori që nderon gjithë njerëzimi viktimat e Nju Jorkut, por dhe 11 shtatori i Pinocetit. Moralisht shprehu nderim për të parim, por në shpirt kishte të dytin. Ne erdhëm këtu, por Rama na shpalli luftë. Nëse vijohet ne këtë mënyrë dëshmohet se etërit janë aty. E dëgjuat krahasimin me vitin ‘92, kjo është hakmarrje. Por në këtë rrugë do i ketë ditët e shkurtra”.

Nga ana tjetër, në karriget e boshatisura të opozitës kamerat fokusuan aleatët Dashamir Shehi (kreu i LZHK) si dhe deputetin e PDIU-së Tahir Muhedini, të cilët vendosën të mos largohen nga salla. Fjala e Ramës u ndoq edhe nga trojka e ambasadorëve si dhe nga drejtues të institucioneve të rëndësishme ndërkombëtare që veprojnë në Shqipëri. “Qeveria do të mbështesë biznesin, si dhe do të krijojë marrëdhënie të reja me sipërmarrësit", tha ndër të tjera Rama, ndërsa shtoi se, "shëndetësia falas është një e mirë publike që i ofrohet çdo njeriu”. Ndërkaq, kryetari i Kuvendit, Ilir Meta i cili i bëri thirrje palëve për qetësi njoftoi se seanca e radhës do të zhvillohet paraditen e së shtunës ora 10:00, pasi opozita të ketë shqyrtuar programin qeverisës.