Peshëngritja shqiptare vlerësohet nga Federata botërore

Presidenti i Federatës Botërore të Peshëngritjes, Tamas Ajan gjatë takimit sot me kreun e Federatës Shqiptare të Peshëngritjes (FSHP), Esat Ademi në Bukuresht ka folur me superlativa për rezultatet e shtangës shqiptare në nëntë vitet e fundit.
Peshëngritja shqiptare vlerësohet nga Federata botërore

Presidenti i Federatës Botërore të Peshëngritjes, Tamas Ajan gjatë takimit sot me kreun e Federatës Shqiptare të Peshëngritjes (FSHP), Esat Ademi në Bukuresht ka folur me superlativa për rezultatet e shtangës shqiptare në nëntë vitet e fundit.

Vetëm pak orë përpara pjesëmarrjes në Kampionatin Botëror të Peshëngritjes për të rinj, që zhvillohet ne Bukuresht deri në datën 21 qershor, sporti që ka sjelle rezultatet më të larta në Shqipëri ka marrë vlerësimet e radhës.
Sipas FSHP-së, Tamas Ajan, ka premtuar mbështetje të fuqishme për zhvillimin e mëtejshëm të kësaj disipline në vendin tonë.

"Peshëngritja shqiptare e dhjetëvjeçarit të fundit mund të cilësohet pa frikë si një histori suksesi", deklaroi Ajan. Ecuria e nëntë viteve të fundit, ku sportistët shqiptarë kanë fituar medalje dhe tituj botërore apo kontinentalë, ishin në qendër të vëmendjes.
Kreu i IEF-së theksoi se "këto rezultate të larta kanë bërë që Ademi të bëhet anëtar i bordit ekzekutiv të Federatës Boterorë të peshëngritjesë që prej muajit maj".

"Nuk mund të mohohet se peshëngritja në rajonin e Mesdheut ka njohur një rritje të konsiderueshme dhe në këtë këndvështrim, edhe Shqiperia ka përjetuar një shpërthim për sa u takon arritjeve në nivelet kontinentale e botërore. Natyrisht, një meritë të madhe kanë edhe drejtuesit e federatës, me presidentin Ademi", theksoi Ajan.

Drejtuesi më i lartë i këtij sporti ka vlerësuar edhe rolin e Shqipërisë në Konfederatën Mesdhetare të Peshëngritjes. "Fryma e suksesit të Shqipërisë është transmetuar edhe në këtë Konfederatë. Vendi juaj do të gezojë mbështetjen e vazhdueshme të IEF-së, në çdo hap që do të ndërmerrni", tha Ajan.

Kampionati Botëror për të rinj ka startuar gjatë ditës së djeshme. Në këtë aktivitet, që perfundon më 21 qershor, do të marrin pjesë katër shtangistë kuqezinj: tre meshkuj, Briken Calja, Ervis Tabaku dhe Endri Karina dhe një femër, Sherjana Ruci. Sipas sekretarit të pergjithshëm të Federates Shqiptare të Peshengritjes, Ilir Kraja, gjendja e sportistëve është mjaft e mirë.

Vitin e kaluar, e vetmja medalje për përfaqësuesen tonë u fitua nga Erkand Qerimaj, në stilin e shtytjes me 181 kg. Edhe këtë vit, objektivi është arritja e medaljeve, duke qenë se Calja dhe Tabaku marrin pjesë për herë të dytë në këtë eveniment dhe kanë eksperiencë të mjaftueshme për të pretenduar rezultate të larta.

Nën drejtimin e trajnerit Sokol Bishanaku, e para që do te ngjitet në pedane në Bukuresht është peshëngritësja Sherjana Ruci, e cila do konkurrojë nesër në peshën 58 kg.

Po nesër, në peshën 69 kg për meshkuj, konkurron edhe Briken Calja. Gara e peshëngritësve shqiptarë vazhdon më 19 qershor me Ervis Tabakun, në peshën 85 kg, ndërsa një ditë më pas në pedanë hipën edhe shtangisti i fundit, Endri Karina, në peshën 94 kg.

Pas Boterorit për të rinj, katër sportistët do të udhëtojnë drejt Italisë, për të marrë pjesë në Lojerat Mesdhetare "Peskara 2009". Ata janë pjese e skuadrës me 10 peshëngritës (7 meshkuj dhe 3 femra), me të cilët Shqiperia do të paraqitet në këtë aktivitet nga 25 qershori deri më 5 korrik. Një detaj mjaft interesant është edhe rikthimi i Fetije Kasajt, e cila ka perfunduar pezullimin 2-vjeçar për përdorimin e substancave të ndaluara