Gati të marrë formë edhe “anija hapësinore” e Steve Jobs!

Një anije hapësinore po projektohet nga "Apple". Realisht, kompania e famshme e themeluar nga Steve Jobs është drejt realizimit të rezidencës së saj të re, një lloj kampusi, që jo rastësisht do të quhet "iSpaceship". Bëhet fjalë për një plan madhor, që më parë duhet të aprovohet brenda nëntorit në Këshillin Komunal të zonës në Cupertino.

Ndër problemet e ngritura nga komuniteti është edhe shtimi i trafikut, përderisa në "lagjen" e Apple do të punojnë rreth 14 mijë vetë. Mirëpo nga ana tjetër, qyteti do të ketë edhe përfitime, pasi kompania veç rezidencës, do të ndërtojë edhe banesa, parqe dhe pista për një vlerë prej 68 milionë dollarësh. Ky kampus i ri duhet thënë se u projektua përpara vdekjes së Steve Jobs, që e kishte prezantuar që atëherë këtë ide të tij: një ndërtesë futuriste prej 4 katesh, në formë unaze me një sipërfaqe prej 360 mijë metra katrorë. Tani ka ardhur momenti që projekti i tij të zbatohet në dy faza, nën firmën e Norman Fosterit.