Liga Ballkanike: E frikshme Prishtina

Publikuar: 19:12 / 14.11.2013



Sigal Prishtina ka shënuar fitoren e radhës në Ligën Ballkanike, duke demonstruar fuqinë ndaj gjigantit malazez, Teodo, me rezultat 74-71.
Atmosfera ishte impozante për duelin ndaj malazezëve ku rreth tre mijë shikues ishin në përkrahje të ekipit nga fillimi i takimit.

Çereku i parë ishte i barabartë, me të dyja skuadrat që arritën të realizonin pikë me sukses.

Në çerekun e dytë shpërtheu Dardan Berisha për të shfrytëzuar një shpërqëndrim të mysafirëve, i cili edhe ndikoi që pjesa e parë të përfundonte me rezultat 39:35.

Më të mirët pas pjesës së parë ishin pikërisht Dardan Berisha dhe Kendrick jones me nga 10 pikë.



Në fillim të pjesës së dytë Prishtina dominoi duke arritur një epërsi prej 10 pikësh, e cila më pas në çerekun e katërt u shkri nga mysafirët deri në një pikë, falë një Vucurovic i cili shënoi 18 pikë dhe ishti më i miri.

Në fund ishte dramë e vërtetë dhe pikët e fitores i realizoi Dardan Berisha nga gjuajtjet e lira, duke konfirmuar edhe statusin e tij prej lojtarit të ndeshjes.

Ndeshja përfundoi me rezultat 74-71 në të mirë të Prishtinës dhe pas ndeshjes së katërt Prishtina gjendet në krye të tabelës së Balkan League me tri fitore dhe një humbje.

Ndeshjen e ardhshme Sigal Prishtina në Ligën Ballkanike e zhvillon ndaj kampionit të Kosovës, Pejës. Dueli zhvillohet më 27 nëntor. /Telegrafi/


--------------------------------------------------------------------------------

Realizatorët më të mirë te Prishtina:
Dardan Berisha (18 pikë)
Kendrick Jones (12 pikë)
K’zell Wesson (12 pikë)
Aurimas Kieza (8 pikë)
Alban Veseli (8 pikë)


--------------------------------------------------------------------------------

Realizatorët më të mirë te Teodo:
Vucurovic (18 pikë)
Subotic (11 pikë)
Kunjic (10 pikë)
Johnson (9 pikë)
Korac (8 pikë)


--------------------------------------------------------------------------------




Fotografia: Telegrafi/Ahmet Huduti