Si ndikojnë ngjyrat në gjendjen tonë shpirtërore!

Shpesh nuk e kuptojmë, ndoshta nuk e dimë, ose nuk arrijmë të bëjmë dallimin, por mënyra se si vishemi, në momente a ditë të caktuara ndikon ndjeshëm në gjendjen tonë shpirtërore, në mënyrën se si e shohim veten, apo edhe njerëzit që na rrethojnë. Është e vërtetë. Perceptimi ynë mbi ditën në kompleksitet, varet nga mënyra se si vishemi dhe cilat ngjyra preferojmë. Ngjyrat edhe mund t’i shfrytëzojmë në favorin tonë, varet se çfarë duam. Kështu p.sh. e kuqja mund të përzgjidhet fare mirë nëse duam që sytë e gjithë botës t’i kemi mbi vete. E kuqja është një prej atyre ngjyrave, që më shumë se cilado tjetër tërheq vëmendjen, në këtë rast jo vetëm të demave, por edhe të njerëzve. Por kujdes, duke qenë një ngjyrë, e cila bie shumë në sy, e kuqja kërkon një kombinim të kujdesshëm. Mos ekzagjeroni, sepse rrezikoni vërtet të tërhiqni vëmendjen, por për keq.

Nëse doni t’i tregoni të gjithëve se ju jeni shumë mirë, jeni rehat, jeni në paqe me veten, atëherë vishni një veshje me ngjyrë blu. Bluja transmeton qetësi dhe paqe, ndaj veshja me këtë ngjyrë, tregon pikërisht gjendjen tuaj.

Në rastet kur doni të jeni e parrezistueshme tentoni me ngjyrat jo tradicionale, siç mund të jenë e verdha ose portokallia. Janë ngjyra të ndezura, të cilat transmetojnë gëzim, e kështu mund të tregoni se jeni e lumtur, ndiheni mirë dhe nuk keni frikë të guxoni me veten tuaj.

Kur vërtet jeni në humor të mirë, atëherë kur ndiheni mirë me veten, ndiheni elegante, në formë dhe keni dëshirë të joshni në çdo rast, asgjë nuk krahasohet me të zezën klasike. E zeza është sa e zakonshme, po aq edhe e veçantë, është mbretëresha e ngjyrave, i shkon kujtdo dhe përshtatet për çdo moment. Madje kjo është ngjyra, e cila bën përjashtim nga përcaktimi i lidhjes së pashmangshme mes veshjeve dhe gjendjes shpirtërore. Ç’ka do të thotë, se jo domosdoshmërish nëse vishni të zezë, jeni të mërzitur, të zymtë, apo doni të justifikoni gjendjen tuaj shpirtërore të rënduar. Të zezën mund ta përzgjidhni edhe për arsyet që thamë më sipër.

Lidhja e ngjyrave me gjendjen shpirtërore nuk është diçka e re, por e vërtetuar nga disa studime dhe sigurisht nga jeta e përditshme e shumë njerëzve. Edhe për njerëzit e famshëm, veshja e tyre flet shumë më tepër se deklaratat e tyre.

Humori dhe veshja ecin dorë për dore

Një studim i Universitetit Hertfordshire, i realizuar mbi mënyrën si vishemi dhe gjendjes sonë shpirtërore ka ngjallur një sërë diskutimesh. Kanë qenë mbi 200 femra, ato të cilat kanë marrë pjesë në studim, duke vërtetuar në këtë mënyrë edhe rezultatet, ndonëse të njohura edhe më parë , të studimit. Femrave ju është kërkuar, që sipas gjendjes së tyre shpirtërore të përzgjidhnin në sirtarët e tyre diçka për të veshur e të shkonin në punë. Rezultatet ishin të tilla që rreth 60% e tyre, në një gjendje stresi, kishin veshur diçka, jo vetëm të pa kombinuar në ngjyra, por edhe në stil. Rrëmuja e veshjes së tyre, ishte e koordinuar edhe me gjendjen e tyre të paqëndrueshme shpirtërore.

Përkundrazi, femrat, të cilat ndiheshin të lumtura, në rehati me veten e tyre, kishin përzgjedhur për të veshur diçka të mirëkombinuar, të rregullt dhe në harmoni me atë ç’ka ndjenin. Veshjet e tyre ishin të “gjalla” në ngjyra dhe shprehnin vetëbesim, ishin në material mëndafsh, të buta dhe të rehatshme. Një tjetër fakt interesant në lidhje me veshjet e femrave, të cilat në ato moment ndiheshin mirë, ishte se ato kishin përzgjedhur pikërisht për të treguar pikat e forta të fizikut të gjithsecilës, pra diçka e veshur qëllimisht për të tërhequr vëmendjen e tjetrit dhe jo diçka rastësore, e cila vishet sa për të dalë nga situata.

Një tjetër fakt i dalë nga kërkimi në Britani ishte edhe ai lidhur me aksesorët shtesë të veshjeve. Ata mund të shërbejnë si një terapi shumë e mirë për të shëruar humorin e zi. Kështu për shembull, nëse jeni të mërzitura, një palë këpucë me takë të lartë, jo model i zakonshëm, mund të jenë mikeshat tuaja më të mira për të luftuar stresin. Po kështu mund të shërbejnë edhe një palë syze, një çantë, një shall, apo kapele. Të gjitha këto, është vërtetuar, se rrisin vetëvlerësimin dhe fitimin e gjallërisë në publik, kryesisht nëse janë të veçanta, tërheqin vëmendjen në mënyrë të menjëhershme.

Kromoterapia, shkenca e ngjyrave

Duket e çuditshme, megjithatë ngjyrat ndikojnë në shëndetin tonë psikik, mirëqenien tonë, mënyrën se me sa pozitivitet e shohim ditën, njerëzit, e me këtë rast, edhe të veshjeve me humorin e njeriut. Studiuesit e kësaj fushe thonë se gjendja jonë shpirtërore , reagon ndryshe për çdo ngjyrë, është një reagim i ndërsjellët mes nesh edhe ngjyrave, ç’ka do të thotë se vendosim të veshim një ngjyrë të caktuar atëherë kur nuk jemi mirë nga gjendja shpirtërore dhe anasjelltas nëse vendosim të veshim një ngjyrë të zymtë, edhe pse pa një gjendje të përcaktuar, në një mënyrë apo tjetrën e përcaktojmë që në këtë moment.

Përshembull, sa herë bëhet fjalë për të kuqen, mendja shkon te gjallëria, energjia, joshja dhe dëshira për të qenë në vëmendje. Nëse jeni pak a shumë në një gjendje të tillë, dashur pa dashur mendja do ju shkojë të vishni diçka të kuqe. Por, vlen edhe ana tjetër, nëse e vishni të kuqen rastësisht, pa e menduar, është vërtetuar se gjendja juaj shpirtërore ndryshon, madje një studim amerikan, kohë më parë, ka treguar se fitimtarët vishen me të kuqe, pra e kuqja rrit autostimen dhe vetëbesimin, duke bërë që si psikologjikisht, ashtu edhe fizikisht të jeni më të përgatitur për të pasur sukses.

Edhe nëse do t’i referoheshim portokallisë, është një prej ngjyrave që përdoret edhe në terapi të ndryshme, madje edhe nëpër reklama është vërtetuar që ngjall pozitivitet, rrit humorin e mirë përveç faktit që tërheq vëmendjen. Portokallia është prej atyre ngjyrave që ju “ngroh” jo vetëm ju, por edhe ata që keni përqark. Mirëpo, duke vënë ngjyrat mënjanë, kromoterapia këshillon edhe mbi veshjen e përdorur. Kujdes sepse mund të rrezikoni të dërgoni sinjale të gabuara tek ata që takoni përmes veshjes suaj. Kështu, nëse xhinset janë shprehje e një personaliteti disi harrakat, të shpërqendruar, xhaketa, sidomos për femrat, tregon nevojë për t’u pranuar, për t’u bërë pjesë, veçanërisht në vendin e punës. Xhaketa është element mashkullor më tepër se femëror, ndaj e veshur nga femrat në vendin e punës tregon “nevojë” për njëjtësim me gjininë tjetër nga frika e përjashtimit, por edhe për të qenë të barabartë në shfaqjen e vlerave./ikub/