Kolegji Zgjedhor rrëzon KQZ-në, pranon kërkesën e PS për Fierin

TIRANË- Kolegji Zgjedhor ka pranuar sot padinë e Partisë Socialiste për Fierin, duke anuluar vendimin e Komisionit Qendror të Zgjedhjeve për Qendrën e Votimit 30 52 në këtë qark.
Pas marrjes në shqyrtim të padisë së bërë, Kolegji ka pranuar kërkesën e Partisë Socialiste, e cila ashtu si edhe në KQZ kundërshtoi që fletët e votimit të Qendrës së Votimit 3052 të përfshiheshin në rezultatin përfundimtar.
Bëhet fjalë për kutinë e shumëdebatuar të Ruzhdies ku 440 fletë votimi u gjendën me një vulë, të cilat do të çregjistrohen nga tabela përmbledhëse e rezultatit për qarkun e Fierit.
Me këtë vendim të marrë nga Kolegji, socialistët blindojnë mandatin e nëntë në këtë qark, pasi kanë thelluar diferencën e votave me PD-në nga 157 në rreth 550 vota.
Trupa gjykuese e përbërë nga pesë anëtarë, pasi ka dëgjuar pretendimet e palëve, PS, PD, PDI dhe KQZ-së u tërhoq për të marrë vendimin. Një mbledhje e cila zgjati rreth 4 orë, ku anëtarët u konsultuan mes tyre deri në marrjen e vendimit. Pas kësaj, Kolegji do të marrë në shqyrtim edhe padinë e PD dhe PDI-së.
Sot ishte seanca e parë e Kolegjit Zgjedhor pranë Gjykatës së Apelit në Tiranë. Partitë politike që janë ankuar zyrtarisht pranë Kolegjit me kërkesat e tyre janë: Partia Demokratike, Partia Socialiste, Partia për Drejtësi dhe Integrim dhe Partia Konservatore. Këto subjekte kontestojnë vendimet e KQZ lidhur me rezultatet e disa KZAZ-ve në Qarqet e Fierit, Beratit, Tiranës dhe Shkodrës. Sipas Kodit Zgjedhor, vendimet e Kolegjit janë të formës së prerë. Anëtarët e kësaj trupe gjyqësore e ushtrojnë detyrën e tyre deri në përfundim të legjislaturës së ardhshme.