Divorc nga gruaja spanjolle: 'Nuk donte të jetonim në Shqipëri'

TIRANE - "Ku është balta më e ëmbël se mjalta? Në Shqipëri". Këtë duket se ka menduar 62-vjeçari Agron V. (lindur dhe banues në tiranë sipas vendimit gjyqësor të shkurorëzimit) kur ka marrë vendimin që pas një kohe të gjatë jashtë atdheut të rikthehet sërish në të. Tashmë i martuar me një shtetase spanjolle, 16 vjet më të re se ai vetë, pas 4 vitesh martese ai e ka parë të arsyeshme që të jetë pranë të afërmve të tij.

Por një gjë e tillë duket se nuk është parë me të njëjtin sy nga bashkëshortja 46-vjeçare, Maria B.S. lindur në Valladolig-Spanjë dhe banuese në Gjermani. Ajo e ka mohuar kategorikisht një kërkesë të tillë të të shoqit. Shkëmbimi i jetës në Gjermani e Spanjë me Shqipërinë është parë si absurde nga ana e saj. Gruaja i ka konsideruar si normale të gjitha vizitat e A.V. për në atdheun e tij, duke u treguar e kuptueshme në këtë drejtim, por një rikthim i përhershëm në Shqipëri, për të vijuar jetën e tyre bashkëshortore, është quajtur i papranueshëm.

Një gjë e tillë ka bërë që të dy të fillojnë grindjet e para pas një bashkëjetese prej rreth katër vjetësh. Këto kanë çuar edhe në vendimin për divorc të tyre, ku 46-vjeçarja e ka dhënë miratimin për ndarje që nga Gjermania, duke mos pranuar absolutisht të vijë në Shqipëri. Sipas vendimit të Gjykatës së Shkallës së Parë të Tiranës, përgjegjëse për shqyrtimin e kërkesës për divorc, Agroni dhe Maria janë njohur në Gjermani në kohën kur shqiptari ishte 58 vjeç, ndërsa spanjollja në moshën 42-vjeçare.

Pas një periudhe realitivisht të gjatë, çifti ka vendosur të lidhet në martesë më 14 qershor 2005, në Tiranë. Fillimisht ata jetuan në Gjermani. Agron Vretos i është dashur disa herë të vijë në Shqipëri për arsye familjare, por kjo gjë është parë mëse normale nga spanjollja.

Paditësi ka rrëfyer në gjyq se fillimisht midis tyre marrëdhëniet bashkëshortore kanë qenë normale dhe korrekte, bazuar mbi dashurinë dhe respektin reciprok. Sipas rrëfimit të tij, me kalimin e kohës midis çiftit kanë lindur mosmarrëveshjet, grindjet, dhe kjo shpjegohet nga ana e tij për shkak të mendësive të ndryshme të tyre. Më pas Agroni kishte vendosur që ata të zhvendoseshin në Shqipëri për të jetuar. Por ky vendim është hedhur poshtë në mënyrë kategorike nga bashkëshortja e tij. Këtu mësohet të ketë filluar edhe përkeqësimi i situatës. Lindën grindjet e vazhdueshme mes tyre.
Ishte bashkëshorti ai që mori nismën për të bërë zgjidhjen e martesës sipas ligjit, duke iu drejtuar Gjykatës së Tiranës. Pas shqyrtimit të provave, gjykatësja Alma Ahmeti krijoi bindjen se martesa midis paditësit dhe të paditurës ishte tronditur thellë si rezultat i grindjeve të vazhdueshme, jetesa e përbashkët ishte bërë e pamundur dhe nuk ngelej gjë tjetër veçse zgjidhja e saj.

Spanjollja nuk u paraqit në asnjë seancë të ndarjes së saj, megjithëse mori dijeni nga njoftimi që u bë. Në bazë të një akti noterial të dërguar me anë të noterit të saj gjerman, ajo pohonte se nuk kishte dëshirë të merrte pjesë në gjyq, por ishte pro zgjidhjes së kësaj martese. Këtu mbyllet aventura e këtij çifti. Tashmë të dy shohin në drejtime të ndryshme.