Pranga 13 zyrtarëve, dyshohen për krim të organizuar

KOSOVË- Një aksion i policisë së Kosovës i shtrirë në gjashtë qytete të vendit ka rezultuar me arrestimin e një gjyqtari, njëmbëdhjetë avokatëve dhe të një zyrtari të sigurimeve nën dyshimin se kanë kryer veprën penale të krimit të organizuar. Lajmin e ka bërë me dije zëdhënësja e policisë së Kosovës, Sabrije Kamberi, por nuk ka dhënë detaje të tjera rreth dyshimit ndaj tyre.

"Bëhet fjalë për katër vepra penale dhe arrestimi i tyre është bërë në gjashtë qytete të Kosovës", tha ajo.

Në një komunikatë të lëshuar nga policia ndërkaq bëhet e ditur se të gjithë personat janë arrestuar sot ndërsa aksioni është udhëhequr nga Drejtoria Kundër Krimit të Organizuar.

"Policia e Kosovës me autorizimet përkatëse të prokurorit të çështjes, kanë ndërmarrë kontrollin e shtëpive dhe lokaliteteve të ndryshme të personave të dyshuar në kërkim të elementeve dhe provave të ndryshme materiale mbi bazën e dyshimit për përfshirjen e tyre në krim të organizuar", thuhet në njoftimin e policisë.

Sipas saj, që të gjithë të arrestuarit janë të gjinisë mashkullore. Me vendim të prokurorit, ata janë dërguar për mbajtje në lokacione të ndryshme policore.