Shqipëria, e 42-ta në listën e destinacioneve të reja turistike!

E renditur mes vendeve më pak të njohura, ajo është një ndër vendet që është sugjeruar për të pushuar dhe vizituar, duke “i bërë dalje” destinacioneve të mbinjohura si Parisi, New York-u. Desticancione këto të fundit, që tërheqin së shumti mjaft vizitorë, por që mund të rezultojnë përvoja zhgënjyese për mjaft turistë për shkak të hoteleve të mbiçmuara apo restoranteve të këqija. Në listën e Këshillit Botëror për Udhëtimet dhe Turizmin, mbizotërojnë vendet e Afrikës, ku vendin e parë e zë Namibia. Në listë përfshihen edhe disa vende aziatike si Kina, Tajlanda, Burma, Kamboxhia. Dhe nuk mungon Shqipëria! Në këtë listë thuhet se këto vende edhe pse nuk kanë ende infrastrukturën e duhur për të zhvilluar më së miri turizmin, po bëjnë përpjekjet e duhura duke hapur restorante, dyqane, duke ndërtuar hotele... Lidhur me Shqipërinë, Këshilli Botëror për Udhëtimet dhe Turizmin shprehet se pas daljes nga hija e Komunizmit në vitin 1992, vendi ende nuk ishte i përgatitur për të pritur turistë. Por rreth 20 vite më vonë, me Alpet Shqiptare, kështjellat dhe bregdetin e paprekur, Shqipëria është një element kryesor, një vend i rëndësishëm për tu vizituar në listën e udhëtimeve në Europë.