Balerinët Esdalini dhe Manjola: Presim fëmijën e parë, dasma në shtator

TIRANE - Ata po jetojnë ditët më të lumtura të jetës. Balerina e njohur e trupës së "Top Chanel"-it, Manjola Hasani dhe bashkëshorti i saj, Esdalin Gorani, janë në pritje të fëmijës së tyre të parë, ndërkohë që ceremonia e dasmës është vendosur të realizohet në shtator. Janë shfaqur në ekranin e televizionit në moshë farë të vogël dhe tashmë janë rritur me të. Shquhen për disiplinë dhe korrektësi në punë, gjë që është e rëndësishme për profesionin që kanë. I kanë kaluar të gjitha fazat e njohjes, duke qenë në fillim miq shumë të mirë dhe më pas vendosën të hidhnin hapin e madh e t'i shprehnin dashurinë njëri-tjetrit.

Çifti i baletit pranon të rrëfejë për Sh2-shin, emocionet e krijimi të një familjeje. Ola i përshkruan si një ndjenjë përrallore momentet që po jeton. Për të është një gjë e mrekullueshme. Shpesh janë konsideruar si çifti misterioz, duke u treguar të rezervuar të flasin në media, por në këtë intervistë rrëfejnë gjithçka për punën, familjen dhe projektet e së ardhmes.


Tashmë jemi në një periudhë pushimesh për të gjithë. Po për ju, ndodh e njëjta gjë?


Ola: Po, edhe ne, si gjithë të tjerët, jemi në periudhë pushimesh. Kemi pasur nevojë shumë për këto ditë pushimi, pasi kemi lënë pas një sezon të ngarkuar.


Sapo keni dalë nga një sezon intensiv pune në "Top..." si ka qenë kjo periudhë që kaloi, e keni ndier lodhjen?

Esdalini: E thamë dhe më lart, ka qenë një sezon i ngarkuar, plot krijimtari koreografike, i ngjeshur, por gjithashtu kemi marrë dhe shumë kënaqësi dhe emocione pozitive nga puna jonë.

Tani po punoni apo jeni në periudhë reflektimi për sezonin që po afron?


Ola: Aktualisht nuk jemi duke punuar, por shumë shpejt do të fillojmë, sepse na pret një tjetër sezon i ngarkuar, i cili nuk duhet kurrsesi të ketë ngjashmëri me sezonet e kaluara.



Sezoni i kaluar ka qenë intensiv dhe me numra baleti cilësor dhe që kërkonin përgatitje, si ia keni dalë, duke parë që realizoni edhe koreografinë?


Esdalini: Sezoni që lamë pas kishte të tjera kërkesa nga sezonet e mëparshme, duke iu shtuar programacionit një tjetër produksion i "TOP CHANNEL"-it, siç mund të përmendim "E DIEL", një program televiziv, i cili duhet të përfshinte të tëra grupmoshat. Kështu dhe pjesa e spektaklit ku përfshihemi ne duhet të ishte më gjithëpërfshirëse. Performancat kanë qenë të shumta për çdo puntatë, të larmishme dhe bashkëkohore.


Ju jeni kolegë në punë dhe bashkëshortë në jetë. Si ia bëni kur keni mosmarrëveshje në punë, si i zgjidhni ato?


Ola: Kur ke mosmarrëveshje në punë midis kolegesh, është më e vështirë t'i kapërcesh ato, sesa kur kolegun në këtë rast e ke bashkëshort. Në rastin tonë ndodhin mosmarrëveshje, por ne shohim anën pozitive, sepse nga diskutimet apo alternativat të ndryshme, lindin ide të bukura dhe të veçanta, dhe tek ne gjithnjë fiton alternativa më e mirë.


Është e vështirë për të dy, të kesh gruan në një ambient pune apo bashkëshortin?

Esdalini: Ka qenë disi e vështirë në fillim, sepse marrëdhënia e një çifti në një ambient pune mund të ketë keqkuptime nga të tjerët, po për ne nuk ka qenë aspak problem.


Ju vetë keni thënë ndonjëherë "ç'm'u desh që bëra këtë zgjedhje..., e kisha marrë ekonomiste (ose një profesion tjetër) dhe mbaroi puna"?

Ola: Jo aspak, për të dy, sepse nëse nuk do të ishim bashkë si bashkëshortë edhe si kolegë, nuk do të kishim këto rezultate që kemi. Pra, nuk kemi dilema për zgjedhjet që kemi bërë.


Ju ka sjellë probleme në çift të qenit në një profesion?

Esdalini: JO.


Ju para se të ishit të dashur keni qenë miq, e kishit menduar ndonjëherë se do të përfundonit të dashur?


Ola: JO.


Si ndodhi që ju të dy ratë në dashuri, kur dhe ku ia shprehët për herë të parë njeri-tjetrit?


Esdalini: Ka ndodhur para shumë kohësh, saktësisht para 7 vjetësh, gjithçka ka lindur shumë spontanisht. Jemi lidhur në një dasmë të një mikut tonë, të dy ne kishim kuptuar se ndjenim diçka për njëri-tjetrin. Në fillim ishim paksa të ndrojtur, pasi ishim shokë prej shumë vitesh, por me kalimin e kohës gjithçka rrodhi shumë mirë dhe ja ku jemi shumë mirë edhe sot që presim me padurim lindjen e një fëmije, pasi Ola është shtatzënë, në muajin e 4-t.

Dikush mund të thoshte, po ju, kaq kohë bashkë, pse u kujtuat shumë kohë më "vonë"?

Ola: Nuk ka qenë vonë, por në momentin e duhur.


E ka sharë ndonjëherë Ola Ezdalinin, apo Ezdalini Olën, para se të ishin të dashur, dhe në qoftë se po, çfarë?


Esdalini: Po, sigurisht që në rrethin shoqëror do ketë dhe sharje apo zënka, por mbajmë mend që nuk jemi zënë shpesh.


Cila është surpriza më e madhe që i keni bërë njëri-tjetrit?

Ola: Ka pasur surpriza nga të dyja palët, por mendojmë se nuk përbën interes për t'i thënë në publik.


Cili nga ju është më i rreptë në punë?

Esdalini: Kohët e fundit jemi bërë të dy.

Për çfarë arsyesh apo rrethanash do ta braktisnit baletin?

Ola: Për asnjë rrethanë apo arsye, sepse është profesioni që dimë të bëjmë më mirë, në të cilin kemi investuar për më shumë se 20vjet.


Për të dy ju, baleti ka qenë qellim në vetvete, apo çdo gjë ka ardhur duke u konsoliduar gjatë viteve?

Esdalini: Në moshën 10-vjeçare nuk mund ta dish dhe nuk mund të zgjedhësh për të ardhmen tënde, pasi je shumë fantil për zgjedhje të tilla, por rrugës gjithçka bëhet më e qartë dhe më bindëse për rrugën që ke marrë dhe vendos pikësynime për atë që do të bëhet në jetë.

Tashmë u bë kohë që njiheni dhe jetoni bashkë. Kur do të realizoni një ceremoni martesore?

Ola: E kemi vendosur në shtator.


Si e mendon Ola veten me fustan të bardhë?

Ola: Me profesionin që kam nuk është ndonjë gjë e re të vishesh me të bardha, por kësaj here do të vishem për ceremoninë time dhe jo për ndonjë ballo apo koncert.

E keni menduar se si do të jetë ajo, ku do të realizohet, sa persona do të ftohen, apo dhe detaje të tjera?

Esdalini: Po merremi me organizimin.


Keni menduar për një dasmë tradicionale, apo moderne?

Ola: T'i ketë të ndërthurura të dyja bashkë.

Jeni të lumtur që në martesën tuaj po vjen edhe një fëmijë?


Ola: Jemi shumë të lumtur, pasi është hapi më deçiziv në jetë për një çift. Është një ndjesi shumë e veçantë, unike, përrallore, pritja e një fëmije.


Jeni treguar vazhdimisht të rezervuar të flisni për vete dhe për jetën tuaj. Ju bezdis fakti i të qenit të njohur dhe njerëz publikë?


Esdalini: Nuk na bezdis fakti i të qenit njerëz publikë, por edhe nuk kemi shumë dëshirë të flasim për jetën tonë.


Keni dëgjuar ndonjëherë thashetheme për vetën tuaj, si keni reaguar ndaj tyre, cili është ai që ju ka ngelur në mendje?

Ola: Thashetheme kemi dëgjuar, por që nuk na bezdisin, mendojmë se është normale për njerëzit publikë.

Në maj të këtij viti ju keni marrë një vendim për t'u larguar nga Teatri i Operës dhe Baletit. Pse erdhi kjo situatë? Do të riktheheshit përsëri në TOB?


Esdalini: Për sa i përket TOB-it, nuk kemi dashur të japim asnjë koment nëpër media, por mund të themi se është një largim i përkohshëm.

PYETËSORI I PRUSTIT PËR ESDALININ


Suksesi ynë më i madh?! Të qenit koreograf


Çfarë është lumturia absolute për ju?


Vështirë ta gjesh.


Çfarë ju bën të zgjoheni në mëngjes?


Zilja e telefonit.


Hera e fundit që keni qeshur me shpirt?


Dje.


Tipari kryesor i karakterit tuaj?


Qetësia.


Defekti juaj kryesor?


Tolerant më tepër se duhet.


Ndaj cilave gabime jeni më tolerant?


Ndaj atyre që mund të tolerohen.


Hera e fundit që u përlotët?


Nuk përlotem.


Udhëtimi juaj i preferuar?


Me makinë.

Cilin virtyt vlerësoni më shumë tek një burrë?


Seriozitetin.


Tek një grua?


Seriozitetin.


Kompozitori juaj i preferuar?


Stravinski.


Kënga që fërshëlleni kur bëni dush?


Nuk këndoj në dush.


Libri që ju la mbresë të pashlyeshme?


"Gjuetari i balonave".


Filmi që ju la mbresë të thellë?


"Aromë gruaje".


Piktori juaj i dashur?


Pikaso.


Ngjyra juaj e preferuar?


E zeza.


Kë konsideroni si suksesin tuaj më të madh?


Të qenit koreograf.


Çfarë është ajo për të cilën pendoheni më shumë?


Nuk pendohem.