Becali: Humbja e Flamurtarit, "mafia bast"

Presidenti i Steauas, në shtypin rumun e konsideron të trukuar ndeshjen Modherwell-Flamurtari 8-1

Presidenti i Setauas së Bukureshtit, Gigi Becali, por edhe trajneri i skuadrës në fjalë, Mihai Stoica, kanë akuzuar Flamurtarin e Vlorës se është përfshirë në "mafia bast", sikurse e quajnë ata. Këto konkulzione të tyre, dy drejtuesit e lartë të Steauas, kundërshtarit të radhës së Flamurtarit në Ligën e Europës, nëse kualifikohej me Modherwellin e Skocisë, nuk kanë ngurruar t'i bëjnë për shtypin rumun. Madje, kjo temë ka qenë kryesorja në mediat rumune ditën e djeshme. Jo vetëm ato sportive, por edhe të tjerat, kanë shkruar se "Gigi Becali akuzon shqiptarët e Flamurtarit, që definitivisht e humbën kualifikimin me Modherwellin, se e kanë luajtur ndeshjen e kthimit në agjenci bastesh. Por ai mohoi të ishte edhe vetë i përfshirë, së bashku me menaxherin e skuadrës, Stoica, në këtë rast."

Duke folur për mediat rumune, konkretisht edhe për dy gazetat më të mëdha sportive të këtij vendi, "Prosport" dhe "Sporturilor", të cilave po u referohemi, Becali ka nënvizuar: "Si të mos kesh dyshime pas asaj ndeshjeje, Modherwell Flamurtari, e cila përfundoi 8 1! Kushdo që merr vesh nga futbolli, e ka të qartë se shqiptarët e Flamurtarit kanë luajtur kumar. Ndoshta ata, të pafuqishëm për t'u kualifikuar, kanë luajtur bast, bazuar mbi një rezultat humbës kaq të thellë, i cili natyrisht ka pasur edhe fitim shumë të madh. Ne nuk do të kemi asnjë problem, sa i takon kualifikimit, në ballafaqimin me Modherwellin. Ata nuk janë të madhësisë tonë. E përsëris, fitorja e tyre 8 1, në kthim me Flamurtarin, për çdo njeri normal është diçka e dyshimtë. Për mua ishte rezultat i fiksuar. Ajo ndeshje ishte luajtur në baste për të fituar para, madje me 6 ose 7 gola ndryshim. Natyrisht, e di se Flamurtari nuk është ndonjë "star" në futboll, por diferencën mes tij dhe Modherwellit nuk mund ta tregojë kurrsesi një humbje kaq e thellë."


Më tej, gazetat rumune në fjalë fusin komentin e tyre, duke nënvizuar: "Çdo herë që luan në Europë një ekip nga Shqipëria, ka një mal dyshimesh mbi ndershmërinë me të cilën ato mbrojnë shanset e tyre. Dukuria është bërë universale tashmë. "Bookmakers" at e shumtë në botë, çdo ditë e më shumë, po preferojnë të mos i luajnë ndeshjet e shqiptarëve "në kokë". Shtypi në Shqipëri nuk shkruan për ndonjë gjë të dyshimtë, por i referohet makthit që ka përjetuar portieri i Flamurtarit në Skoci, ku ka pësuar 8 gola, madje edhe tallet me të. Gazetarët atje kanë shkruar disa herë mbi reputacionin e përfolur të skuadrave të tyre në Europë, por askush nuk mund të japë edhe dyshimin më të vogël të mundshëm e të detajuar në lidhje me një dështim të qëllimshëm të Flamurtarit. Sidoqoftë, në Shqipëri ekziston bindja se futbolli i tyre mund të jetë përfshirë disa herë në skandale ndërkombëtare të këtij sporti, ndaj edhe populli i thjeshtë i ka braktisur stadiumet."

Po kështu, "Prosport" dhe "Sporturilor", kanë shkruar krahas akuzave të Becalit dhe Stoicas se, "kompanitë e basteve në Skoci kanë informuar se e kanë ngrirë luajtjen e kësaj ndeshjeje, pasi ajo ka fiksuar rezultatin 6 0 në mbarim të pjesës së parë. Drejtues të kompanive kryesore të basteve në vendin ishullor kanë saktësuar se janë luajtur shuma të mëdha në internet për këtë ndeshje, diçka që ishte një praktikë e zakonshme për ta, por jo e tillë, që parashikonte një rezultat të jashtëzakonshëm në kësi veprimtarish, pas 45 minutave lojë. Kur ndeshja ka fiksuar rezultatin 6 0, atëherë dyshimet janë bërë të forta dhe ndeshja nuk është lejuar të luhet më "live", pasi normat e fitimit ishin shumë të pakëndshme për kompanitë e basteve në Skoci".
Ndërkohë, nga ana e tij, menaxheri i Steauas, Tudorel Stoica, që e ka përcjellë nga afër ndeshjen Modherwell Flamurtari 8 1, është shprehur i habitur nga mpirja e lojtarëve shqiptarë në fushën e lojës. "Pavarësisht se Modherwelli fitoi 8 1 në ndeshjen e kthimit me Flamurtarin, për mua nuk ka aspak vend për alarm. Unë jam plotësisht i bindur se ajo që pashë me sytë e mi në Skoci, fitorja 8 1 e Modherwellit ndaj Flamurtarit, është një rezultat krejtësisht i gënjeshtërt. Steaua është mësuar të luajë futboll nga minuta e parë deri në të fundit. I dimë mjaft mirë forcat tona dhe nuk i trembemi aspak Modherwellit. Kualifikimi është në dorën tonë."


Kujtojmë se para ndeshjes së kthimit, mes Modherwellit dhe Flamurtarit, pas fitores së kuqezinjve në Vlorë 1 0, presidenti i Steauas së Bukureshtit, Gigi Becali, kishte shprehur preferencën e tij që të ballafaqohej me shqiptarët në turin pauses, atë të tretin të Ligës së Europës: "Unë dua që të kualifikohet Flamurtari, sepse do të shpenzonim më pak duke vajtur në Shqipëri. Pastaj atje ka shumë arumunë. Plus kësaj, do të ishte më mirë për ne të luanim në Ballkan. Nëse unë shkoj shpesh në Shqipëri? Posi jo? Gjyshja ime ka bërë shkollë atje. Plus kësaj, në atë zonë ka shumë që flasin në gjuhën arumune."