AAK-ja përcaktohet për Rrahim Sadikun

Pasi ka dështuar me analistin Ramush Tahiri dhe me ish kryetarin e komunës Faik Grainca, më në fund Dega e Aleancës për Ardhmërinë e Kosovës (AAK) në Ferizaj është përcaktuar për kandidatin për kryetar komune. Ky do të jetë Rrahim Sadiku, ish gazetar i të përditshmes “Rilindja”, aktualisht përgjegjës për kulturë në komunën e Ferizajt. Sadiku pasi ka bredhur gati nëpër të gjitha partitë politike, së fundit nga LPK- ka kaluar në AAK.

Rrahim Sadiku vjen nga fshati Komogllavë, prej nga vjen edhe kryetari aktual i komunës, Bajrush Xhemaili, i cili kohë më parë e ka bërë publik faktin se do të konkurrojë edhe për një mandat tjetër. Zyrtarë nga Dega e AAK-së thonë se çdo gjë është e kryer, vetëm pritet zyrtarizimi i kandidaturës për kryetar komune të Rrahim Sadikut.

Ndërkohë selia e AAK’së në Prishtinë ka paralajmëruar se zyrtarizimin e kandidatit të saj për kryetar të komunës së Ferizajt do ta bëjë të hënën. Në anën tjetër LDD-ja LDK-ja, ARK-ja, si partitë më të mëdha opozitare, ende nuk janë përcaktuar për kandidatët e mundshëm për kryetar të komunës së Ferizajt.

Ndërsa përflitet se kandidat i mundshëm i LDK-së mund të jetë nënkryetari i kësaj Dege, Faik Grainca, për LDD-në thuhet se kandidat mund të jetë kryetari i Degës, Milazim Haliti. Edhe përpjekjet për një krijim të një blloku opozitar duket kanë dështuar. Kjo si duket ka bërë që kandidaturat për kryetar komune të partive tjera të jenë fare formale, ndërsa kryetari aktual i komunës, Bajrush Xhemaili, që vjen nga radhët e PDK-së, edhe sipas anketës së organizatës joqeveritare INPO, ka dalë të jetë shumë i besueshëm për votuesit e mundshëm, madje në masën prej 51 për qind.