BBC: BE, standartet e zgjedhjeve prishën planet për Shqipërinë

Ministrat e Jashtëm të BE-së janë mbledhur sot në Bruksel ku i kanë kërkuar Komisionit Evropian të fillojë vlerësimin e gatishmërisë së Islandës për anëtarësi.


Bisedimet për anëtarësi me Islandën, e cila aplikoi për anëtarësi në BE pasi u godit rëndë nga kriza financiare globale, pritet të ecin përpara me shpetësi. Megjithatë ministri i Jashtëm suedez, Carld Bildt, mohoi se Islanda do të marrë trajtim të preferuar.


"Nuk do të ketë një proces të shpejtë për Islandën, por është e qartë se ka tashmë një proces më të shkurtër për Islandën, sepse ata janë tashmë pjesë e një tregu të vetëm dhe në zonën Shengen," tha zoti Bildt. "Ka edhe aplikime të tjera mbi tavolinë, është aplikimi shqiptar, megjithëse ne nuk jemi ende atje, dhe mund të ketë edhe të tjerë," tha ai dhe shtoi: "Zgjerimi mbetet një çështje e rëndësishme."


Ky hap ndaj Islandës mund të çojë në zhgënjim në mesin e vendeve Ballkanike që kanë kohë që kanë aplikuar për anëtarësi. Islanda aplikoi për anëtarësi në BE vetëm të enjten e shkuar në përpjekje për t'i dhënë shtytje ekonomisë së saj të goditur rëndë dhe për t'u dhënë garanci investitorëve të huaj. Si pjesë e klubit të quajtur Zona Ekonomike Evropiane ky ishull i vogël në Atlantikun e Veriut zbaton tashmë gati dy të tretat e ligjeve të BE-së. Islandezët mundet gjithashtu të udhëtojnë pa kufizime në vendet e BE-së.

Ndersa Shqipëria, që aplikoi për anëtarësi në BE në prill, ende po pret të marrë një përgjigje, për shkak të pasigurisë lidhur me rezultatin e zgjedhjeve të muajit të shkuar.


Mali i Zi priti për pesë muaj para se aplikimi t'i dorëzohej Komisionit Evropian për shqyrtim. Ndërkohë bisedimet e anëtarësimit me Kroacinë, Turqinë dhe Maqedoninë janë bllokuar për shkak të mosmarrëveshjeve midis fqinjëve, në rastin e Kroacisë, si dhe shqetësimeve ndaj zgjerimit të mëtejshëm në Gjermani e disa vende të tjera të BE-së.

Invervista e korrespondentes se BBC-së për çështjet evropiane, Oana Lungescu, ne Bruksel


Por çfarë duhet të presin vende si Shqipëria dhe vende të tjera të Ballkanit perëndimor nga presidenca suedeze?


Oana Lungescu: Për vende si Mali i Zi mund të duhet deri në një vit që komisioni të japë një përgjigje. Presidenca suedeze, megjithatë, është ndoshta një nga ato që favorizon më shumë zgjerimin. Në fakt Suedia së bashku me Britaninë, deri në një farë mase, janë ndoshta të vetmet në mesin e 27 vendeve anëtare të BE-së që flasin me zë të lartë dhe qartazi në favor të zgjerimit të BE-së, që tregon se sa çështje e vështirë është bërë zgjerimi, jo vetëm për shkak të shqetësimit të krizës ekonomike, por edhe për frikën e emigracionit, apo shqetësimit se nuk ka një traktat të ri ende.

Ekziston ndjenja se për shkak të pasigurive në vetë Shqipërinë, dhe shqetësimit për pranimin e anëtarëve të rinj në BE, blloku do të shmangë ndonjë njoftim të ri lidhur me zgjerimin deri pas zgjedhjeve gjermane më 27 shtator dhe referendumit irlandez më 2 tetor. Kështu, Shqipërisë mund t'i duhet të presë deri në tetor si afati më i afërt për të marrë ndonjë përgjigje për aplikimin e saj.

Megjithatë, Suedia, është një presidencë e mirë për vende si Shqipëria dhe ministri i Jashtëm suedez Karl Buildt ka thënë shprehimisht se ai mendon se BE-ja nuk duhet ta vonojë zgjerimin në drejtim të Ballkanit sepse kjo gjë mund të shfrytëzohet nga nacionalistët dhe të rrisë rreziqet politike.

Por edhe Britania këmbënguli që në deklaratën e mbledhjes së tanishme të Ministrave të Jashtëm Shqipëria të përmendet veçanërisht. Dhe në deklaratë është një paragraf që thotë se "BE-ja përfiton nga rasti të ritheksojë mbështetjen e saj të plotë për perspektivën evropiane të Ballkanit Perëndimor" dhe thekson se "do t'i kthehet aplikimit të Shqipërisë për anëtarësi kur procesi i zgjedhjeve shqiptare të ketë përfunduar".

Një zyrtar i BE-së, që e pyeta lidhur me procedurën e aplikimit të Shqipërisë, më tha se "ishte me të vërtetë e çudishme që Shqipërisë iu desh më shumë se tre javë për të dalë me rezultatet përfundimtare të këtyre zgjedhjeve". Pra, BE-ja do t'i ndjekë nga afër këto rezultate, me të vërtetë me shumë kujdes!

Çfarë thonë në BE lidhur me këtë vonesë të daljes me rezultatet përfundimtare në Shqipëri?


Oana Lungescu: Ata janë të çuditur. Siç e thashë, ky zyrtar më tha se ishte "shumë për t'u çuditur që pas tre javësh nuk kishite ende rezultat përfundimtar", dhe se "mbajtja e zgjedhjeve të lira dhe të drejta ishte një gjë shumë e rëndësishme". Që nga fillimi Shqipëria e dinte se ky ishte një kusht i qartë dhe numërimi i votave është pjesë e procesit zgjedhor. Dhe, siç më tha mua ky zyrtar "nëse nuk mundet të numërojnë votat, kjo është shumë interesante".


******************


Ne Tirane nderkohe ministria e jashtme vijon te ushqeje publikun me deklarata entuziaste per "biseda telefonike te rendesishme"..
"Në përfundim të procesit zgjedhor, tejet i rëndësishëm për përafrimin e Shqipërisë me Bashkimin Evropian, dhe që u vlerësua nga personalitet më të larta evropiane dhe amerikane në deklarata publike si më i miri i zhvilluar ndonjëherë në Shqipëri, është intensifikuar dinamika diplomatike në lidhje me integrimin evropian të vendit. Përshpejtimi i shqyrtimit të kërkesës së Shqipërisë për statusin e vendit kandidat në Bashkimin Evropian dhe heqja e vizave për qytetarët shqiptarë kryesojnë axhendën e diplomacisë shqiptare. Pikërisht për këto dy çështje prioritare, ditët e fundit, ministri i Punëve të Jashtme, z. Lulzim Basha, ka pasur një sërë bisedash telefonike me homologë të tij. Biseda telefonike mes ministrit Basha dhe ministrit të Jashtëm të Suedisë z. Carl Bild, vend i cili ka kryesinë e radhës së Bashkimit Evropian, u bë publike nga shefi i diplomacisë suedeze në konferencën për shtyp me ministrin e Jashtëm të Islandës në Stokholm. Carl Bildt, një nga njohësit më të mirë të Ballkanit dhe mbështetës i procesit të zgjerimit të Bashkimit Evropian, ka siguruar se presidenca suedeze mbështet shqyrtimin pa vonesa të kërkesës së Shqipërisë për statusin e kandidatit, si dhe përmbylljen e procesit të liberalizimit të vizave për shtetasit shqiptarë", - thuhet në një njoftim për shtyp të Ministrisë së Jashtme.

Sikur të mos mjaftonte kjo telefonatë shumë e rëndësishme, Basha ka thënë se ai ka bërë dhe një tjetër telefonatë me peshë. Basha ka folur me ministrin e Jashtëm italian dhe për më tepër i ka thënë atij se zgjedhjet ishin shumë të mira.

"Shqyrtimi i shpejtë i kërkesës së Shqipërisë është kërkuar publikisht edhe nga ministri i Jashtëm i Italisë dhe ish zv/President i Komisionit Evropian, Franco Frattini, në një deklaratë publike, bërë në Trieste. Ministria e Punëve të Jashtme të Shqipërisë bën të ditur se ministri Basha ka zhvilluar paraditen e djeshme një bisedë telefonike edhe me z. Frattini. Duke e falënderuar ministrin Frattini për mbështetjen e fortë që Italia i jep integrimit evropian të Shqipërisë, ministri Basha e ka njohur homologun Frattini me mbarëvajtjen e procesit zgjedhor, si dhe angazhimin e qeverisë shqiptare për të vijuar me vendosmëri në plotësimin e detyrimeve që rrjedhin nga procesi i anëtarësimit në Bashkimin Evropian.

Ministri i Jashtëm italian rikonfirmoi vullnetin dhe angazhimin e palëkundur të Italisë për përmbushjen, në kohë të shpejtë të liberalizimit të regjimit të vizave për qytetarët shqiptarë, si dhe të shqyrtimit të kërkesës, siç e vlerësoi ai, tashmë të avancuar të Shqipërisë për kandidim në Bashkimin Evropian. Frattini ka vlerësuar progresin e madh të bërë nga Shqipëria dhe ka theksuar se Italia do të vazhdojë të jetë avokate e integrimit të Shqipërisë në Bashkimin Evropian, ndërsa ka shprehur edhe përgëzimet për kryeministrin Berisha për fitoren e zgjedhjeve të 28 qershorit", - thuhet në njoftimin e MPJ.

Reagimi qesharak i Bashës vjen, pasi Brukseli dha sinjale shumë të forta se nuk do e marrë tani në shqyrtim aplikimin e Shqipërisë për anëtarësim në BE. Mundet që më vonë ministrat e Jashtëm të kërkojnë një vlerësim nga Komisioni Evropian, por burime diplomatike thonë se sërish gjasat janë që të mos ketë një vlerësim të shpejtë e për më tepër do kërkohet një riaplikim nga Shqipëria. Reuters raportoi së fundmi se Gjermania është e vendosur që mos fusë në tryezën e diskutimeve aplikimin e Shqipërisë. Brukseli e ka bërë të qartë disa herë se nuk pret lobime politike nga Shqipëria, por kërkon reforma të thella.