Rezolutat, përplasje në Asamble

Mbledhja e djeshme e Asamblesë Kombëtare u zhvillua përmes diskutimeve të shumta, duke shmangur debatet e ashpra. Anëtarët e saj të ndarë në dy grupime mbështesnin rezolutën e propozuar nga kryetrari socialist Edi Rama dhe tjetra nga një grup prej 38 anëtarësh të propozuar nga anëtarja e kryesisë socialiste Mimoza Hafizi. Pasi ka nisur mbledhja, drejtuesi i Asamblesë, Gramoz Ruçi ia dha fjalën kryetarit socialist, i cili kishte thirrur këtë mbledhje e që nisi të lexojë projektvendimin e që kishte të bënte me thirrjen e kongresit, ku do të miratohej rezoluta për zgjedhjet dhe zbatimi i pikave të statutit për ndërprerjen e mandatit të kryetarit. Në këtë moment, anëtarja e Asamblesë, Rajmonda Stefa i kërkoi kryetarit të zbatojë statutin, që do të thotë ndërprerje e mandatit pas humbjes së zgjedhjeve. Rama i është përgjigjur se do të jetë Kongresi ku do të realizohet ky përcaktim i statutit. Më pas Rama ka lexuar rezolutën e propozuar prej tij, ndërsa Blushi pas tij ka kërkuar të shmanget bojkoti i Kuvendit nga grupi parlamentar socialist. Ka qenë kreu i Asamblesë, Ruçi i cili është shprehur se “asnjëherë nga askush nuk është përmendur bojkoti i parlamentit”. “Ju zoti Ruçi keni qenë për bojkot të kuvendit në mbledhjen e parë të kryesisë pas zgjedhjeve të 28 qershorit”, është shprehur Blushi. Ndërsa nga ana e tij, Ruçi e ka pranuar këtë qëndrim të tij, por e ka justifikuar këtë pozicion të lidhur ngushtë me fatin e kutive të votimit në qarkun e Fierit. Ishte anëtarja e kryesisë socialiste, Mimoza Hafizi e cila lexoi rezolutën e paraqitur në asamble dhe të firmosur nga 38 anëtarë të saj. Që në fillim të diskutimit, është qartësuar se të dyja rezolutat takoheshin në një pikë, shmangnin bojkotin e parlamentit nga grupi parlamentar socialist në kuvendin e ri. Më pas diskutimet janë vendosur në pranimin e humbjes dhe njohjen e rezultatit zgjedhor. I pari që e ka marrë fjalën ishte Maqo Lakrori, i cili ka kërkuar që të njihet rezultati i humbjes dhe të bëhet një analizë e plotë rreth tij. “Tashmë kemi rezultatin zyrtar të zgjedhjeve të 28 qershorit. Sipas Kushtetutës së Shqipërisë fituesi i zgjedhjeve përcaktohet nga numri i deputetëve dhe jo nga numri i votave të zgjedhësve. Rrjedhimisht, fituese rezulton Partia Demokratike, edhe si parti edhe si koalicion. Ky është rezultati zyrtar dhe për qëndrimin ndaj tij ne duhet të konsiderojmë disa mundësi”, u shpreh Lakrori. Në mbështetje të rezolutës së anëtarëve të asamblesë, kanë folur gjithashtu Elmaz Sherifi, Kastriot Islami, Arben Malaj, Ben Blushi, Marko Bello, Ilir Zela, Musa Ulqini, Flamur Hoxha, Rajmonda Stefa etj., që kanë mbështetur përveç hyrjes në Kuvend të PS, pranimit të rezultatit zgjedhor, por dhe një analizë të thellë të humbjes e nxjerrjes së përgjegjësive. Në fund të diskutimeve Blushi e ka konsideruar fitore të grupit të anëtarëve të Asamblesë që rezoluta e miratuar, shmangu bojkotin e Kuvendit. Ndërsa një grup tjetër anëtarësh, jo vetëm kanë mbështetur variantin e Ramës, por e kanë përqendruar diskutimin e tyre në mbrojtjen e kreut socialist. Servet Pëllumbi, Namik Dokle, Fatmir Xhafaj, Erioin Braçe, Eduart Shalësi, Sajmir Tahiri, Ledi Shamku, Damian Gjiknuri, Qemal Minxhozi, Ndriçim Hysa, Taulant Balla kanë qenë në krah të Ramës dhe kanë kërkuar përgjegjësi kolektive për zgjedhjet. Shamku në nisje të fjalës së saj, ka uruar Asamblenë për fitoren e PS-së në këto zgjedhje. Ndërsa Xhafaj, ka këmbëngulur në një qëndrim të fortë të rezolutës, pasi sipas tij, “nëse nuk e bën PS të fortë qëndrimin e saj për zgjedhjet, si presim ta bëjnë ndërkombëtarët?”