Rama: Hapi i parë, komision hetimor parlamentar

Një ditë pas Asamblesë Kombëtare, Kryetari i PS-së, Edi Rama, ka sqaruar vendimet e marra në këtë asamble dhe agjendën që opozita do të ndjekë në të ardhmen


TIRANË - Një ditë pas mbledhjes së Asamblesë Kombëtare, kryetari i PS-së, Edi Rama, deklaroi se selia rozë ka përgatitur një raport të hollësishëm për zgjedhjet, që do t'u vihet në dispozicion të gjithë partnerëve ndërkombëtarë.


Duke iu referuar vendimit të Asamblesë Kombëtare, lideri i opozitës theksoi edhe njëherë se zgjedhjet e 28 qershorit, janë një mundësi e humbur në raport me pritshmërinë dhe me objektivin, që duhet të përmbushnin jo për partitë politike, apo për të përcaktuar kush do të fitonte dhe kush do të humbiste, por për Shqipërinë dhe imazhin e saj.


"Dhe për këtë ka vetëm një përgjegjës, Sali Berisha dhe qeveria e tij, që deformuan qëllimshëm procesin zgjedhor, nga ku doli një rezultat i deformuar. Prandaj, ky rezultat është i papranueshëm për PS-në, si një shprehje e deformuar e vullnetit të zgjedhësve, nga manipulimi dhe korrupsioni elektoral, para, gjatë dhe pas 28 qershorit",- tha ai.


Rama saktësoi se qysh prej mbledhjes së Asamblesë Kombëtare, PS-ja është distancuar hapur nga çdo rrugë dhe përpjekje për t'i imponuar PS-së, opozitës dhe opinionit në tërësi, të miratimit pa kushte të një rezultati zgjedhor, që nuk e shpreh vullnetin e lirë të popullit shqiptar.


"Ne do të bëjmë çmos për të bërë deri në fund transparencën e plotë të procesit zgjedhor me të gjitha instrumentet ligjore dhe kushtetuese, duke qenë të predispozuar të përdorim çdo mjet demokratik për këtë qëllim.


Kutitë e mbyllura përfundimisht nga pikëpamja e përmbajtjes së tyre në raport me rezultatin juridik, ne nuk i konsiderojmë të mbyllura përfundimisht në raport me domosdoshmërinë për të bërë një transparencë, që i vlen procesit politik në Shqipëri dhe që është një detyrim karshi popullit shqiptar",- tha ai. Më pas, Rama iu përgjigj edhe pyetjeve të gazetarëve.


Z. Rama, pse gjatë mbledhjes së fundit të Asamblesë Kombëtare nuk u lejuan kamerat dhe media që ta ndiqnin nga afër atë se çfarë ndodhte aty?


Mbledhjet e Asamblesë Kombëtare bëhen me statut të mbyllura dhe ato hapen për median vetëm me vullnetin e Asamblesë Kombëtare. Dje nuk ishte as rasti dhe as vullneti për ta bërë një gjë të tillë.


Sa mund të ndikojë në qëndrimin e grupit parlamentar socialist fakti se kërkesa e rreth 35 anëtarëve të asamblesë, shumica anëtarë të kryesisë dhe deputetë, nuk u mor parasysh?


Unë mendoj që Grupi Parlamentar i PS-së, do të jetë solid, i konsoliduar, i harmonizuar dhe i koordinuar në funksion të një vendimmarrjeje, që do të jetë fryt i sintezës i të gjitha mendimeve dhe diskutimeve të brendshme, të secilit në lirinë dhe në të drejtën e tij për t'u shprehur, gjë që asnjëherë nuk ka munguar dhe nuk do të mungojë në PS.


Në politikën shqiptare ka pasur edhe precedentë të tjerë të mëparshëm ku janë kërkuar komisione hetimore, por që në fund nuk kanë arritur asgjë. Pse mendoni se ky komision hetimor që do të kërkoni ju për zgjedhjet, do të funksionojë?


Së pari, komisioni hetimor parlamentar për transparencën e 28 qershorit apo për të zbardhur atë që ne e quajmë vendosmërisht krimi elektoral i 28 qershorit, është një nga instrumentet dhe ne do ta vëmë atë menjëherë në lëvizje, duke bërë gjithë përpjekjen tonë që t'i shkojmë deri në fund procesit të hetimit parlamentar. Por nuk është i vetmi instrument.


Sa shanse ka që të provokohen zgjedhje të parakohshme, kur ju nuk keni numrat?


Lidhur me vlerën numerike të rezultatit, nga pikëpamja juridike nuk mund të diskutohet, por nga pikëpamja politike është tërësisht e kontestueshme dhe për këtë arsye, ne do ta kontestojmë në vijimësi legjitimitetin e kësaj qeverie, do ta kontestojmë në vijimësi sovranitetin e këtij Parlamenti të ri dhe ne besojmë që ky produkt i kalbur i një procesi të kalbur, jo vetëm meriton të kontestohet, por janë të gjitha arsyet për të besuar pikërisht se qëndrimi ynë nuk përfaqëson një qëndrim, që vjen si rezultat i një taktike politike, por një qëndrim që vjen si rezultat i një të vërtete, që shqiptarët e dinë mirë, veçanërisht ata që janë trysnuar apo grabitur.


Pra, pikërisht për këtë arsye, ky qëndrim jo vetëm ka forcën e nevojshme për ta vendosur Parlamentin dhe qeverinë në atë pozicion që meritojnë, por është një bazë shumë e fortë për të synuar zgjedhjet e parakohshme, pavarësisht afatit të tyre dhe jo si qëllim në vetvete për të ndryshuar ngjyrën e pushtetit, por si një domosdoshmëri për t'i dhënë sovranitet të pakontestueshëm Parlamentit, legjitimitet të pakontestueshëm politikisht qeverisë dhe mundësi vendit për të bërë reforma, të cilat me këtë Parlament e me këtë qeveri janë praktikisht të pamundura.


Ne do të shkojmë menjëherë, apo do të kthehemi menjëherë te shqiptarët e shqiptaret në të gjithë territorin dhe do të ndërtojmë një proces komunikimi intensiv, që do të përkthehet edhe në shfaqje demokratike të protestës për një rezultat të papranueshëm.


Shqiptarët nuk mund të pranojnë kokulur një Parlament dhe një qeveri që nuk ka lindur nga shprehja e lirë dhe numërimi i ndershëm i vullnetit të tyre përmes votës. Sigurisht që kjo është një rrugë, të cilën do ta përshkojmë me durim, por me një vendosmëri të palëkundur.


Z. Rama, ju flisni sot në emër të PS-së, se ajo do të bëjë gjithë këto veprime në të ardhmen, ndërkohë që data 29 gusht, megjithëse është ende një muaj, larg mund të sjellë dhe ndryshim në lidershipin e saj, i cili nuk mund të ketë këto objektiva...


Unë sot po komentoj qëndrimin zyrtar të PS-së, i cili nuk lidhet me aspektin tjetër, që do të zgjidhë Kongresi i Jashtëzakonshëm, që është lidershipi i PS-së. Por lidhet me atë që PS-ja do të bëjë, pavarësisht nga rezultati i Kongresit të Jashtëzakonshëm për lidershipin e PS-së.


Unë jam në legjitimitet të plotë për të thënë ne, sepse ky është një qëndrim dhe një vendim solemn i një institucioni të Partisë Socialiste, që ka të gjitha atributet për të vendosur një qëndrim politik dhe për t'ia kaluar këtë qëndrim politik për një ratifikim përfundimtar


Kongresit të Jashtëzakonshëm të Partisë Socialiste, ku sigurisht do të diskutohet edhe pjesa e dytë e rendit të djeshëm të ditës të Asamblesë Kombëtare, që ka të bëjë me zbatimin e statusit të Partisë Socialiste, gjë që shqetësoi dhe krijoi shumë diskutime, të cilat pa asnjë dyshim kanë legjitimitetin e tyre, për sa u përket komenteve dhe analizave.


Por, është për të ardhur keq, që ndërkohë, i tërë diskutimi u fokusua në këtë aspekt, që ka të bëjë me një vendimmarrje të Partisë Socialiste dhe nuk u fokusua në një aspekt tjetër. Zgjedhjet e 28 qershorit nuk janë zgjedhjet që meritojnë shqiptaret dhe shqiptarët.


Zgjedhjet e 28 qershorit u manipuluan dhe rezultati i tyre u deformua përmes një korrupsioni elektoral para, gjatë dhe pas fushatës dhe ndërkohë që shfaqja më e shëmtuar në historinë e zgjedhjeve, qysh pas vitit 1996, e një KQZ të kthyer në një instrument ilegal përmes vendimmarrjesh ilegale në kundërshtim me ligjin, zhvillohej, pakkush ngrinte zërin dhe fliste për këtë. Kjo për mua është shprehje e një situate alarmante për demokracinë në Shqipëri, e një gjendjeje, trysnie edhe për mediat në Shqipërinë.


Ju flisni për mbrojtjen e këtyre hapësirave të lirisë në krye të PS-së, ndërkohë që nuk dimë se ç'do ndodhë më tej me pozicionin tuaj. Në këtë kuptim, mund të na thoni cili do jetë pozicioni juaj në këtë parti?


Së pari, këto hapësira unë i kam mbrojtur qysh në vitin 1990 minimalisht dhe do vazhdoj t'i mbroj pavarësisht pozicionit tim dhe, së dyti, besoj se nuk do ma merrni për keq në rast se ju them se, çdo punë në radhën e vet.

Do rikandidoni?


Pyetja juaj e merr përgjigjen e duhur në ditën dhe në kohën e duhur, që është dita e Kongresit të Jashtëzakonshëm.


Çfarë do të ndodhë me strukturat e tjera të partisë, si sekretariati, kryesia etj., pra, a duhet të riformatohen ato?


Kjo është edhe më tutje në radhën e gjërave. Sot unë dua të bëj të qartë qëndrimin e PS-së ndaj zgjedhjeve dhe dua të komunikoj me ju dhe përmes jush me të gjitha ata që janë shumë të interesuar, këtu flas për opinionin publik, nuk flas për Sali Berishën që ka edhe ai interesin e vet ta dijë, por për arsye të tjera, se cili do të jetë profili i opozitës me hapjen e sezonit të ri politik dhe pse opozita do të ketë këtë profil.


Nëse rizgjidheni kryetar, a do të këmbëngulni tek politika përtej të majtës dhe të djathtës?


Përgjigjja është po ajo, radha e punës. Do të kemi kohë të flasim për të gjitha këto, po bindja ime është se shqiptarët nuk e kanë kundërvotuar projektin tonë politik, por projekti ynë politik nuk ka arritur të marrë miratimin e shqiptarëve për t'u kthyer në një alternativë qeverisëse, sepse rezultati i zgjedhjeve nuk është shprehje e vullnetit të lirë të popullit shqiptar dhe produkt i një numërimi të ndershëm të votave të shqiptarëve.


Pra, s'kemi pasur zgjedhje të lira dhe të ndershme që të na garantonin një rezultat që të shprehte vullnetin e popullit shqiptar dhe për këtë arsye, unë nuk kam asnjë arsye që të pranoj se projekti politik nuk ka marrë votëbesimin e shqiptarëve.


Cili është qëndrimi juaj ndaj grupit kundërshtues si Malaj?


Në mënyrën më absolute unë i shikoj të gjitha përpjekjet, e të gjithë miqve, bashkëpunëtorëve dhe kolegëve për të hapur një debat lidhur me një qëndrim - që është shumë i rëndësishëm - politik të PS-së, në raport me një proces, më i rëndësishmi për një forcë politike, që është procesi zgjedhor, si shprehje të atij diversiteti dhe të asaj natyre që ka familja jonë politike, që padrejtësisht është parë dhe është komentuar herë pas here si një familje ku kjo gjë mungon. Kemi bërë një debat të gjatë dhe shumë të vlefshëm dhe kemi arritur rezultatin e duhur.


Z. Rama, ata që ju në përgjigjen tuaj i konsideruat miq dhe kolegë, mbajnë një qëndrim krejt ndryshe nga ju në lidhje me rezultatin, duke përcaktuar si arsye të tij mungesën e një programi, personalizimin e fushatës dhe mospërcjellja si duhet e alternativës socialiste në fushatë....


Sigurisht që ata mendojnë ndryshe, por kjo nuk do të thotë që nuk janë miqtë dhe kolegët e mi, kështu që edhe ju për këtë arsye po pyesni, sepse ata mendojnë ndryshe. Unë mendoj ndryshe dhe asambleja vendosi.


Duke iu referuar statutit, ashtu siç edhe thonë miqtë tuaj në rezolutën që ata paraqitën, mandati juaj si kryetar partie është ndërprerë në momentin e shpalljes së rezultatit të zgjedhjeve.


Në këto kushte, në cilësinë e kujt, ju, z. Rama, i drejtoheni opinionit publik?


Në po atë cilësi që Kryeministri u drejtohet shqiptarëve, edhe pse teorikisht apo juridikisht mandati i tij sot është ndërprerë, ose në rast se nuk do të rizgjidhej Kryeministër do të vazhdonte t'u drejtohej shqiptarëve, pavarësisht se mandati i tij është ndërprerë, sepse nuk ka vakum.


Si kryetar në detyrë, kujt ia keni deleguar kompetencat, pasi në 2005-ën, në momentin që Nano dha dorëheqjen, ia delegoi kompetencat Ruçit?


Një kryetar në detyrë është një kryetar që bën detyrën dhe detyra që ka kryetari në detyrë është detyra e kryetarit.


Rruga që do të ndiqet


Ne do të shkojmë menjëherë, apo do të kthehemi menjëherë te shqiptarët e shqiptaret në të gjithë territorin dhe do të ndërtojmë një proces komunikimi intensiv, që do të përkthehet edhe në shfaqje demokratike të protestës për një rezultat të papranueshëm.


Shqiptarët nuk mund të pranojnë kokulur një Parlament dhe një qeveri që nuk ka lindur nga shprehja e lirë dhe numërimi i ndershëm i vullnetit të tyre përmes votës. Sigurisht që kjo është një rrugë, të cilën do ta përshkojmë me durim, por me një vendosmëri të palëkundur.


Rezultati


Lidhur me vlerën numerike të rezultatit, nga pikëpamja juridike nuk mund të diskutohet, por nga pikëpamja politike është tërësisht e kontestueshme dhe për këtë arsye, ne do ta kontestojmë në vijimësi legjitimitetin e kësaj qeverie, do ta kontestojmë në vijimësi sovranitetin e këtij Parlamenti të ri dhe ne besojmë që ky produkt i kalbur i një procesi të kalbur, jo vetëm meriton të kontestohet, por janë të gjitha arsyet për të besuar se qëndrimi ynë nuk përfaqëson një qëndrim që vjen si rezultat i një taktike politike, por një qëndrim që vjen si rezultat i një të vërtete.


Për qëndrimin e Malajt dhe Blushit

Në mënyrën më absolute unë i shikoj të gjitha përpjekjet, e të gjithë miqve, bashkëpunëtorëve dhe kolegëve për të hapur një debat lidhur me një qëndrim - që është shumë i rëndësishëm - politik të PS-së, në raport me një proces, më i rëndësishmi për një forcë politike, që është procesi zgjedhor, si shprehje të atij diversiteti dhe të asaj natyre që ka familja jonë politike, që padrejtësisht është parë dhe është komentuar herë pas here si një familje ku kjo gjë mungon. Kemi bërë një debat të gjatë dhe shumë të vlefshëm dhe kemi arritur rezultatin e duhur.