Cana lider edhe në Sunderland

Pasi i ka dhënë lamtumirën Marseilles, Lorik Cana e ka filluar aventurën e re me Sunderlandin. Ai është prezantuar të enjten zyrtarisht te klubi anglez. Mesfushori kosovar pretendon të jetë lider edhe te Sunderland. 26 vjeçari Premierligën e vlerëson më të mirën në botë, ndërsa premton se do ta japë 300 përqindëshin për ekipin e tij të ri.

Nga Express më 30.07.2009 në ora 18:05
"…Dëshiroj ta jap 300 përqindëshin, të jem i fortë dhe të jem lider. Të jem lider është gjë natyrale. Mendoj se loja ime është tipike britanike…"
Sunderland e ka prezantuar të enjten transferin më të ri, Lorik Cana.

Futbollisti shqiptar kishte zhvilluar seancën e fundit stërvitore me Olympique Marseille të hënën, para se t’i bashkohej ekipit të ri.

Ndërsa të enjten paradite reprezentuesi i Shqipërisë e pati prezantimin zyrtar me Sunderlandin, për të cilin klub nënshkroi kontratë katërvjeçare.

Ai e pati edhe stërvitjen e parë me klubin e ri.

Cana theksoi se ndihet i eksituar me eksperiencën e re, ku premton se do të japë gjithçka nga vetja.

“Ndihem mirë. Ishte stërvitja e parë e imja, klub i ri, aventurë e re për mua”, tha Cana për televizionin e klubit SAFC TV.

“Jam mjaft i eksituar që i bashkohem Premierligës, përshtypjet e mia janë të mira. Kontakti im i parë me menaxherin dhe me asistentin e tij, sot do t’i takoj të gjithë futbollistët”, shtoi ai.

Cana dëshiron të bëhet lider i Sunderlandit këtë sezon. Ai e përshkruan veten lider natyral dhe dëshiron ta arrijë kulmin në Angli.

“Dëshiroj ta jap 300 përqindëshin, të jem i fortë dhe të jem lider. Të jem lider është gjë natyrale. Mendoj se loja ime është tipike britanike”, vazhdoi ai.

Me Sunderlandin ai synon të arrijë rezultate të mira. Cana dëshiron ta shfaqë eksperiencën e tij te klubi anglez.

“Unë po pres të luaj për Sunderlandin dhe të arrij rezultate të mira. Kam luajtur në dy prej klubeve më të mëdha në Francë dhe në Ligën e Kampionëve. Tani jam këtu për të pasur një eksperiencë të mirë personale me Sunderlandin dhe ta ndihmoj këtë klub”, u shpreh kosovari i cili e konfirmoi se është i pasionuar pas futbollit anglez.

“Për mua, Premierliga është më e mira në botë, të gjithë në botë e përcjellin atë. Kjo është arsyeja se pse erdha këtu. Sunderland është një vend fantastik për të luajtur, me fansa të jashtëzakonshëm. Unë jam fitues. E posedoj eksperiencën për të luajtur në një ligë të fortë si kjo dhe po mundohem ta bëj këtë me Sunderlandin”, përfundoi Lorik Cana.

Për t’i siguruar shërbimet e futbollistit shqiptar, skuadra e maceve të zeza i ka paguar Marseilles 6 milionë euro.

Marseille në zemër

Para se t’i bashkohet ekipit të ri, Cana e ka dhënë një intervistën lamtumirëse për televizionin e klubit të Marseilles, për të cilin thotë se do t’i mbetet gjithmonë në zemër.

“Është moment special i jetës sime. Rrugët tona janë ndarë, por askush nuk mund ta dijë të ardhmen...”, ka thënë Cana i cili iu bashkua Marseilles në gusht të vitit 2005 nga Paris Saint Germain.

“Kalova këtu katër vjet të mrekullueshme, të paharrueshme. Unë do të vij këtu shpesh dhe do ta përcjell Marseillen”, shtoi Cana.

Edhe pse nuk arriti ta fitonte asnjë titull kampioni me Marseillen, Cana është krenar me atë që arriti gjatë këtyre viteve me klubin nga Velodrome.

“Gjatë viteve të fundit ne kontribuuam që ta ngremë lart Marseillen. Për fat të keq nuk dolëm ta fitonim titullin sezonin e fundit.. Por, ne shkuam larg, shkuam në Evropë”, vazhdoi ai.

Pa dyshim, deri tash, vitet më të mira të Lorikut ishin te Marseille. Edhe ai e di këtë.

“Gjërat që i përjetova këtu do të jetë vështirë t’i përjetoj diku tjetër. Do të jem gjithmonë i lidhur me këtë vend, OM do të jetë klubi im i përhershëm. Tash unë do të shkoj në një ligë tjetër, do ta provoj një sfidë tjetër. Kjo ishte zgjedhja më e mirë për mua”, përfundoi Cana i cili gjatë qëndrimit në Marseille u shndërrua në idhull të tifozëve të klubit marsejez.