Ligji për martesat homoseksuale nxit reagime

Pas deklaratave të kryeministrit Berisha për legalizimin e martesave homoseksuale, reagoi ashpër Kisha Katolike dhe ajo Ortodokse. Nëpërmjet monsinjor Gergj Frendo, Kisha Katolike ka kundërshtuar miratimin këtij ligji, që sipas saj cenon konceptin e martesës dhe shenjtërinë e familjes shqiptare. Ndërkohë, Kisha Ortodokse deklaroi se kjo çështje duhet të rishikohet dhe qeveria të angazhohet me problemet sociale të shoqërisë, meqë shoqëria shqiptare ruan një moral të shëndetshëm familjar e shoqëror.

Nga Express më 30.07.2009 në ora 20:06
Një ditë pas deklaratave të kryeministrit Berisha, se do të njohë dhe do të legalizojë martesat homoseksuale, ka reaguar ashpër Kisha Katolike në Shqipëri. Monsinjor Gergj Frendo, përdor Biblën si argument të fortë kundër martesës homoseksuale, duke deklaruar se martesa mes gjinisë së njëjtë është mëkat që ndalohet nga libri i shenjtë.

“Martesa është bashkim i burrit dhe i gruas. Ne nuk kemi asnjë aftësi të dënojmë ose të gjykojmë homoseksualët, megjithatë nuk mund të injorojmë faktin që sipas planit të zotit se martesa është bashkim i dy sekseve të ndryshme. Fatkeqësisht sot ligje të tilla konsiderohen si shenja përparimi, por në të vërtet nuk është ashtu, përkundrazi është detyrë e çdo shteti të mbroj martesën. Ne si të krishterë pranojmë martesën e dy sekseve të ndryshme, nuk është e pranueshme ideja që martesa të bëhet mes dy sekseve të njëjta”- u shpreh monsinjor Frendo.

Monsinjor Frendo shkon edhe më tej duke deklaruar se pas legalizimit të martesave të homoseksualëve do të cenohet shenjtëria e familjes shqiptare.

“Është detyrë e shtetit të mbrojë konceptimin e martesës dhe familjes. Sot martesa dhe familja janë në rrezik për arsye se janë në rritje numri i divorceve, ndaj të mos e shtojmë rrezikun duke transformuar konceptin e martesës.
Pas këtij ligji, kjo gjë do të kalojë edhe tek fëmijët, fëmija ka të drejtë të rritet në një bashkësi familjare i sekseve të ndryshme”, shtoi monsinjor Frendo.

Ndërkohë, për martesën mes gjinisë së njëjtë ka reaguar edhe Kisha Ortodokse, e cila ka dënuar një veprim të tillë dhe ka kërkuar nga qeveria t’i kushtojë më shumë kujdes problemeve sociale të shqiptarëve, sepse kjo lloj martese është problem për shoqërinë. Peshkopi, Andon Merdani, ka theksuar se martesa e tillë s’mund të aprovohet nga ana fetare.

“Për Kishën Ortodokse, sikurse edhe për shumë Kisha tjera, veprimi dhe akti që kryhet mes dy njerëzve të së njëjtës gjini është i dënueshëm. Për këtë arsye çdolloj veprimi, aq më tepër kur ai bëhet edhe ligjërisht, nuk shikohet me sy të mirë dhe nuk mund të aprovohet nga ana jonë, si besimtarë dhe si Kishë. Mendoj se është diçka e nxituar, pasi në Shqipëri ka probleme të mëdha sociale”, u shpreh peshkopi Merdani.

“Do të ishte e rëndësishme t’i kushtojmë vëmendje problemeve reale, se sa të ngrijmë e të krijojmë shqetësime të cilat mendojmë se nuk ekzistojnë në shoqërinë shqiptare, e cila ruan një moral të shëndetshëm familjar e shoqëror. Çështja duhet të rishikohet dhe të gjithë ne të angazhohemi për problemet që e shqetësojnë këtë shoqëri, aq më tepër që ne edhe këtë lloj martese e shikojmë si një problem”, përfundoi Merdani në intervistën dhënë për ‘News24’.
Megjithatë, Shqipëria duket se do të bëhet vendi i parë në Ballkan dhe i katërti në Evropë që do të lejoj me ligj martesat homoseksuale.

Në mbledhjen e së mërkurës të Këshillit Ndërministror të Integrimit kryeministri Sali Berisha theksoi se projektligji që e lejon këtë lloj martese ka ardhur si propozim i shoqërisë civile. I gatshëm për t’i thënë “po” këtij ligji në parlamentin e ri, Berisha pohoi se shoqëria shqiptare në këtë mënyrë zhduk diskriminimin për këtë pakicë njerëzish.

Aktualisht vetëm tri vende - Holanda, Belgjika dhe Norvegjia- nga 27 sa ka Unioni Evropian, e kanë bërë të ligjshme martesën homoseksuale. Një përpjekje e njëjtë në Italinë fqinje ka ngjallë reagim të fortë të Vatikanit.