Kuqi: Pavarësi e ligjshme

Zëvendëskryeministër Hajredin Kuçi ka thënë se shpallja e pavarësisë së Kosovës ka qenë në përputhje me të ligjin ndërkombëtar dhe nuk ka asnjë pengesë që shteti i ri të njihet megjithëse Gjykata Ndërkombëtare e Drejtësisë është në proces të nxjerrjes së një mendimi këshillues për këtë çështje, me kërkesë të Serbisë.

“Shpallja e pavarësisë së Kosovës ka qenë në përputhje të plotë me të drejtën ndërkombëtare. Nuk do të donim që ky mendim këshillëdhënës i Gjykatës së Drejtësisë të jetë pretekst për askënd që ta njohë pavarësinë e Kosovës. Ju e dini që Kosovën e kanë njohur edhe ato shtete, të cilat e kanë themeluar këtë Gjykatë Ndërkombëtare të Drejtësisë”, ka thënë ai, në një konferencë shtypi në Prishtinë, pas një takimi me një delegacion të despotëve arabë.

“Dhe, unë jam shumë i bindur që procesi i njohjes së Kosovës nuk do të lidhet me atë mendim këshillëdhënës, sikur që jam shumë i bindur se mendimi këshillëdhënës do të jetë në favor të së drejtës që i takon Kosovës”, theksoi Kuçi.

Zëvendëskryeministri ka ftuar shtetet arabe që nuk e kanë njohur Kosovën, që ta bëjnë këtë në të ardhmen e afërt, pa u ndikuar nga procesi ligjor në Hagë dhe lidhjet e moçme të vendeve arabe me shtetin e dikurshëm jugosllav.

“I luta që perceptimi për ish-Jugosllavinë të ndryshojë prej së kaluarës. Rajoni dhe ish - Jugosllavia tani janë krejt ndryshe. Njohja që do t’i bëhet Kosovës nga këto shtete nuk e dëmton askënd, përkundrazi kontribuon për paqen, stabilitetin por edhe perceptimin pozitiv të qytetarëve të Kosovës për tërë botën”, ka thënë Kuçi.

Deputet arabë të enjten janë pritur edhe nga ministri i Jashtëm, Skënder Hyseni si dhe nga lideri i AAK’së, Ramush Haradinaj. Ky i fundit ka shprehur gatishmërinë për të lobuar në botën arabe.

Delegacioni nga Egjipti, Iraku dhe Jordania kanë premtuar se do të angazhohen për të siguruar njohje të reja për Kosovën, ndonëse kanë theksuar se çështja e Kosovës nuk përbën ndonjë prioritet për shtetet arabe për shkak të problemeve të brendshme që kanë këto shtete. Vetëm katër nga njëzet e dy shtete arabe e kanë njohur pavarësinë e Kosovës.