Edi Rama me i varfri - Zbardhet pasuria e familjes Berisha, Topit dhe ministrave

Kryetari i Partisë Socialiste Edi Rama vazhdon të jetë një ndër politikanët më të varfër në Shqipëri. Inspektorati i Lartë i Deklarimit dhe Kontrollit të Pasurive ka publikuar dje pasuritë e rreth 500 zyrtarëve të lartë për vitin 2008. Nga deklarimi i pasurisë, kreu i Bashkisë së Tiranës rezulton të ketë një llogari me 40 mijë lekë të reja në Bankën Credins, të përfituar nga kursimet nga paga si dhe një llogari tjetër me 2937 euro, po në këtë bankë, të përfituar nga çmime dhe honorare. Kreu i socialistëve ka pasur të ardhura gjatë vitit të kaluar 1.8 milion lekë të reja, falë pagës në krye të bashkisë, shpërblimit të fundvitit, si dhe pagesa për pjesëmarrjen në mbledhjet e KRT-së. Në të njëjtën kohë, Rama gjatë vitit 2008 ka paguar 207 mijë lekë lekë (principal+interes) për shlyerje kredie. Nga deklarimi i pasurisë rezulton se Ramës i ka ngelur edhe 1.2 milion lekë për ta shlyer. Kryetari i Partisë Socialiste, Edi Rama rezulton të jetë politikani më i varfër nga ata që kanë deklaruar pasuritë e tyre. ndërkohë që ka deklaruar si të ardhura vetëm rrogën dhe honoraret, Rama është akuzuar nga kryeministri Berisha, por edhe nga biznesmenë të ndryshëm, se merr 20% për çdo leje ndërtimi të dhënë.
Fatos Nano
Por ndërsa kreu aktual i PS-së mbetet një nga politikanët më të “varfër”, nuk mund të thuhet e njëjta gjë për ish-kryetarin e socialistëve. Fatos Nano gjatë vitit të kaluar ka nënshkruar një kontratë për blerjen e dy shtëpive në Durrës, me sipërfaqe 210 m2 dhe 166 m2 me vlerë 176.720 euro, si dhe ka hapur një llogari të re në Bankën Intesa Sanpaolo me shumën 24.884 euro. Të ardhurat më të mëdha gjatë vitit 2008, Nano i ka nga gjyqi i fituar me revistën italiane “L’Unita”, ku ka marrë 134 mijë euro. Nano ka marrë një pagë totale për vitin 2008 prej 1.4 milion lekë falë mandatit të deputetit dhe 805 mijë lekë nga posti i ish kryeministrit. Nga ana tjetër, bashkëshortja e tij, Xhoana Nano ka nënshkruar një kontratë sipërmarrje për blerjen e një sipërfaqe prej 313 m2 në Shkodër me vlerë 266.050 euro, ndërkohë që ka përfituar interesa nga depozita në bankën Intesa Sanpaolo në shumën 10.040 euro.

Edi Rama

- Kursime nga paga 40.938 lekë

- Çmime dhe honorare 2937 euro

- Paga vjetore, shpërblim fund viti, pagesa për mbledhje KRT 1.850.807 lekë

- Shlyerje kredie 207.173 lekë