Gjyqi elektoral i PD

Demokratët bënë në heshtje atë që iu kishte mbetur për të bërë: si pjesë e opinionit publik, e kthyen edhe ata vëmendjen te humbësi i zgjedhjeve politike të qershorit, pra te PS, te procesi që do të përjetojë kjo parti, pasi nuk mundi t'i sjellë socialistët në pushtet. Demokratët heshtën, sepse nuk mundën t'i gëzohen fitores, sepse nuk mund të thonë dot që janë fitues të këtyre zgjedhjeve. Thjesht, fituan krerët e PD, të cilët fshehën me kujdes atë që ka ndodhur realisht, pra faktin që edhe këtë radhë PD mori më pak vota se PS. Megjithatë, ata do të mbeten në qeverisje, këtë radhë duke zëvendësuar aleancën me punistët e PAA me një pjesë tjetër të së majtës, me LSI. Produkt i këtyre zgjedhjeve nuk ishte fitorja elektorale e PD, por humbja politike e PS. Edhe këtë radhë, ashtu siç ka ndodhur në të gjitha zgjedhjet politike dhe lokale që janë zhvilluar në Shqipëri (14 gjithsej, nëse do të përshijmë edhe dy referendumet për miratimin e Kushtetutës), me përjashtim të zgjedhjeve të vitit 1992 dhe zgjedhjeve lokale përgjithësisht të pranuara të vitit 1996, PD ka marrë më pak vota se PS. PD ka një bilanc negativ elektoral, i cili, po të analizohet në tërësinë e tij, pra i shtrirë në kohë për krejt periudhën e tranzicionit shqiptar, 1991-2009, është një bilanc zhgënjyes për çdo demokrat dhe një bilanc tragjik për vetë PD. Është zhgënjyes për demokratët, sepse PS ka marrë më shumë vota se PD në dhjetë nga katërmbëdhjetë rastet, kur shqiptarëve iu është dashur të votojnë dhe të ndajnë qëndrimin e tyre ndaj dy partive të mëdha, PD dhe PS, pa neglizhuar këtu edhe votimet për miratimin e projekt-Kushtetutës, të realizuara përkatësisht në vitet 1994 dhe 1998, që për shumë arsye në një analizë politike nuk kanë pse të ndahen nga votimet e tjera. PD e ka mundur PS vetëm në vitet 1992 dhe 1996. Është një bilanc tragjik për PD, si një parti që u ngrit mbi shpresën shqiptare për demokraci, që mblodhi energjinë më të madhe popullore të mbledhur ndonjëherë, kapitalin më të madh politik, që realisht një parti ka pasur ndonjëherë në Shqipëri. Ai kapital u tret pa mundur të investohet realisht dhe në një pjesë të madhe të tij në të mirë të shqiptarëve. Rezultatet e zgjedhjeve tregojnë ekzaktësisht këtë gjë. Tragjizmi qëndron në atë se jo demokratët, pra jo PD,