Kivu: Do t'i tregojmë ferrin Italisë!

Kapiteni i Rumanisë, Kristian Kivu, tha se skuadra e tij do t'i krijojë shumë probleme Italisë kampione të botës, kur të ndeshen nesër. "Do t'i bëjmë të ndihen si në ferr. Ata do të mundohen të fitojnë, por ne do t'ua vështirësojmë shumë punët," tha Kivu për gazetarët nga vendqëndrimi i Rumanisë në bazën stërvitore të St Galen Arenës. Rumania barazoi pa gola ndaj Francës finaliste të Botërorit 2006 në ndeshjen e parë të Grupit C të hënën, ndërsa Italia pësoi një humbje poshtëruese 3-0 ndaj Holandës, në të njëjtin grup. Por për Rumaninë disfata e Italisë ndaj holandezëve nuk do të thotë asgjë. Kivu vijoi, duke thënë se "Italia është kampione e botës dhe mbetet skuadër e madhe. Vërtet pësuan një humbje, por nuk mund të themi se janë skuadër e dobët. Çdo ekip mund të njohë ditë negative," tha Kivu. Mbrojtësi, i cili luan në Itali me Interin, bëri të ditur se trajneri Viktor Piturka nuk i ka kërkuar informacione për lojtarët "axurrë", edhe pse i njeh mirë. "Çfarë mund të them më tepër për Italinë? Të gjithë e njohin Italinë. Unë nuk kam dhënë asnjë informacion, - tha Kivu. - Ne kemi një trajner që po na përgatit shumë mirë, dhe ai e njeh mjaftueshëm Italinë. Ai dëshiron vetëm të sigurohet që të gjithë të jemi të gatshëm." Rumania u mbrojt mirë ndaj Francës, por nuk krijoi shumë raste dhe Kivu tha se tifozët kanë të drejtë të presin diçka më shumë ndaj Italisë në Zyrih. "Natyrisht, do të mundohemi të krijojmë më shumë raste, por ne kemi një plan loje dhe parësore është të mos humbasim. Duhet të kemi shumë kujdes," përfundoi ai. Rumania do të ndeshet me Holandën në ndeshjen e saj të fundit në grup të martën.

S.KONDI

Piturka, besim të plotë te Mutu

Trajneri i Rumanisë, Viktor Piturka, ka shumë besim tek Adrian Mutu për vetë famën që gëzon ky i fundit, si një prej sulmuesve më të mirë në Europë. Përpara katër vitesh, karriera e Mutusë preku fundin, pasi ai u largua nga Çelsi mes polemikave të shumta, por 29-vjeçari e ka rimarrë plotësisht veten në Itali. Piturka ka pasur gjithnjë besim te futbollisti, edhe pse ai u pezullua shtatë muaj për shkak të përdorimit të disa substancave të ndaluara. "Kur unë e mora drejtimin e skuadrës atij sapo i kishte përfunduar pezullimi dhe e thirra menjëherë në kombëtare." Futbollisti i tregoi menjëherë vlerat, duke shënuar shumë gola me fanellën e përfaqësueses. "Ai ka shfaqur një karakter të jashtëzakonshëm dhe kalimi i tij te Juventusi i dha një mundësi të madhe, - tha Piturka. - Ai ishte kalimi te një klub i madh dhe një gjë e tillë i bëri shumë mirë Adrianit. Pavarësisht se kaloi disa momente shumë të vështira, ai tregoi se ka karakter të madh, se e meriton të jetë aty ku është sot dhe ku ka arritur me forcat e tij. Pra, mes më të mirëve."