Vëllaznimi ndali Trepçën

Vëllaznimi – Trepça 1:0
Pas tri fitoresh radhazi në Superligë, Trepça është ndalur të mërkurën në Gjakovë, pasi humbi nga Vëllaznimi me rezultat minimal 1:0. Pas humbjes në Prishtinë nga Flamurtari, gjakovarët ia vunë vetes si obligim fitoren, dhe ia dolën. Në pjesën e parë të dyja skuadrat patën rastet e tyre, por nuk i shfrytëzuan. Edhe në të dytën nuk munguan rastet, por vetëm njëri u shndërrua në gol. Ishte pikërisht minuta e 86-të kur i palodhshmi Robert Gjeraj harkon deri tek sulmuesi Alban Bekteshi, i cili nuk fal, 1:0. Gëzimi tek publiku gjakovar ishte i pa përshkruar. Marrë në përgjithësi, Vëllaznimi fitoi me meritë, mundi iu shpërblye në fund.

Kosova (V) – Hysi 1:0
Kosova e ka shënuar fitoren e dytë të sezonit, pasi e mposhti Hysin me rezultat minimal. Pas një pjese të parë të baraspeshuar, ku patën raste të dyja palët, vushtrriasit e gjetën golin e fitores në pjesën e dytë, pas sulmeve të njëpasnjëshme. Ndodhi kjo në minutën e 57-të përmes Ilir Izmakut, i cili e mposhti portierin mysafir Neziri.

KEK-u – Drenica 6:0
KEK-u bëri një paraqitje të shkëlqyeshme, duke e dërrmuar Drenicën, të cilën e përcolli në shtëpi me 6 gola. “Elektricistët” i treguan dhëmbët qysh në pjesën e parë, ku shënuan plot 4 gola. Serinë e golave e nisi Ymer Xhaferi, pasi mori një top nga Virtyt Hashani (min 13). Vetëm një minutë më vonë, Virtyt Hashani e shtoi epërsinë në 2:0 pasi nga largësia e paraboloi portierin mysafir. I njëjti futbollist e ngriti avantazhin e vendësve në 3:0 në minutën e 21-të, pas harkimit nga e djathta të Berat Grabovcit. Ky i fundit shënoi gol të bukur 3 minuta pa përfunduar pjesa e parë, 4:0. Listës së golashënuesve iu shtua edhe Visar Zogiani, i cili realizoi në minutën e 58-të. Ndërkaq, goleadën e mikpritësve e mbylli sulmuesi Kastriot Rexha, për rezultatin përfundimtar, 6:0.

Ferizaj – Prishtina 1:0
Kampioni aktual, Prishtina, e ka pësuar edhe humbjen e tretë. Bardhekaltrit u mposhtën të mërkurën nga Ferizaj. Vendësit ishin më të mirë dhe sulmuan që nga minutat e para. Ata e qëlluan tërthorësen në minutën e 11-të me anë të Sherif Topallit. Mikpritësit e gjetën golin e fitores në minutën e 58-të përmes futbollistit Florim Berisha, të cilit iu kthye topi nga portieri Statovci, pas një gjuajtjeje të Fitim Sadriut.

Flamurtari – Besa 2:1
Flamurtari e ka konfirmuar formën e mirë, duke e mposhtur edhe Besën e Pejës.
Kuqezinjtë kaluan në avantazh të parët në minutën e 22-të. Më parë, Zejnullahu harkon nga këndi i djathtë i fushës, e gjen Desaret Dervishin, që me kokë e mposhtë portierin Valmir Bytyqi. Nuk kaluan as 7 minuta, e vendësit e dyfishojnë avantazhin. Sërish në aksion mori pjesë këmbëshpejti Zejnullahu, që e gjen sulmuesin me përvojë Malësor Gjonbalaj, 2:0. Pejanët lëshuan disa raste të mira në pjesën e parë, ndërsa në të dytën nuk arritën më shumë se një gol të shënuar, atë në minutën e 87-të nga penalltia, me realizator Mensur Durakun.