Largim i planifikuar

Mesfushori i Real Madridit, Xavi Alonso ka pranuar se kishte planifikuar largimin nga Liverpool prej momentit kur menaxheri Rafa Benitez ishte munduar ta shesë atë vitin e kaluar. Benitez deshi ta shesë Alonson në Juventus në korrik 2008, për të ngritur para për transferimin e mesfushorit Gareth Barry nga Aston Villa.

Alonso ishte i dëshpëruar të dëgjonte se Benitez dëshiron ta shesë dhe vendosi të largohet kur iu ofruar mundësia e përshtatshme. Transferimi i tij u kompletua kur iu bashkua Real Madridit për 38 milionë euro në gusht, pasi kishte njoftuar Benitezin se dëshiron të largohet nga Anfield Road.

“Ishte vendim shumë i vështirë. Pas pesë viteve të shkëlqyeshme në Anfield Road, kam përjetuar përkrahjen e jashtëzakonshme nga ndoshta tifozët më të mirë në botë. Kjo është arsyeja pse gjithmonë do t’u jem mirënjohës dhe gjithmonë do të jenë në mendjen time sepse më kanë bërë të jem i lumtur. Por, vitin e kaluar klubi më propozoi shitjen për ardhjen e futbollistëve të rinj. Ishte vendim i vështirë dhe gjë e vështirë për t’u pranuar. Por, e kam pranuar si profesionist dhe ai moment më ndryshoi mendjen dhe mendoja se ndoshta ishte koha e duhur për ndryshim”, deklaroi Alonso për Sky Sports News.