Vendit i duhet një kryeministër legjitim

Dje në stanet e mafies lufta mes klaneve arriti në një stad të ri. Dje, klani që dominon trafiqet, klani që dhunoi votat, klani që dominon aferat e pista dhe tangjentopolin, zgjodhi për kryeministër të socialistëve Ilir Metën.
Për PD dhe shumicën e shqiptarëve Meta është direkt përgjegjësi kryesor i dhunimit të votës së tyre të lirë. Është dhunues kryesor i vullnetit të lirë politik të shqiptarëve. Më 24 qershor, Meta me tanke, plumba, shkopinj gome, drogë, me bandat e tij në polici, SHIK e gjykata, kreu krimin më të shëmtuar në historinë e demokracisë, dhunimin masiv të vullnetit politik të shqiptarëve.
Për demokratët shqiptarë, për shumicën e shqiptarëve, ai përbën motivin më madhor, detyrimin më sublim për t'i dhënë vendit kryeministrin legjitim, për t'u kthyer shqiptarëve dinjitetin e vullnetit të lirë, të dhunuar.
Për PD Ilir Meta është njeriu që përfaqëson klanin më të rrezikshëm të trafiqeve në Shqipëri, të trafikut të drogës, të trafikut të fëmijëve dhe të trafikut të vajzave të mitura.
Në historinë e vendit ky mbeti njeriu që me bandat e tij ngjiti Shqipërinë në krye të listës së vendeve të planetit në trafiqet e skllevërve të seksit, të fëmijëve, të drogës dhe të armëve.
Për PD dhe shumicën e shqiptarëve beteja kundër trafiqeve është detyrimi i tyre madhor për një të ardhme tjetër si shoqëri e qytetëruar, si shoqëri e respektuar. Ilir Meta është njeriu që riktheu portretin e Hitlerit në institucionet e tij të krimit.
Ai është vrasësi dhe terroristi i opozitës, është njeriu që urdhëroi hedhjen e granatave mbi gjimnazistët në Tropojë, njeriu që torturoi e burgosi qindra kundërshtarë politikë dhe që sipas Amnesty International dhe institucioneve të tjera prestigjioze, Shqipëria renditet në vendet e para me të burgosur politikë dhe tortura politike.
Meta është njeriu që ndërtoi pushtetin e tij mbi krimin, trafiqet, korrupsionin e organizuar, ndaj dhe rikthimi në Shqipëri i një kryeministri legjitim mbetet obligimi madhor më absolut i shqiptarëve, i shumicës së tyre që votuan kundër tij, kundër pushtetit të tij të krimit dhe të korrupsionit, i atyre që besojnë në vlerat e demokracisë. Meta përfaqëson vrasësin e vërtetë të fjalës së lirë, është simbol i injorancës njerëzore, i tmerrit nga fjala e lirë.
Ky është kryeministri i parë në historinë e pluralizmit që me taksat e shqiptarëve blen shtypin, blen dhe përdhos fjalën e lirë të shqiptarëve.