Berisha: Dobësimi i lekut nuk është problem serioz; opozita të kthehet në parlament

Kur ne shkuam për të intervistuar kryeministrin Sali Berisha, ai
ishte duke i dhënë dorën e fundit fjalimit që do të mbante në debatin e
Asamblesë së Përgjithshme të Kombeve të Bashkuara.

Ne e pyetëm atë fillimisht se çfarë kontributi mund të ofrojë një vend i vogël si Shqipëria në këtë debat.

Sali Berisha - Së pari, shembullin e saj, e përzgjedhur si vend
pilot në kuadrin e reformës së organizatës së Kombeve të Bashkuara. Por
dhe në kuadrin e "Millenium Goals", mendoj se Shqipëria ka qenë e
suksesshme në luftën kundër varfërisë.

Po të kemi parasysh se në tre vjet, 400 000 qytetarë kanë kaluar
pragun e varfërisë për të ardhurat për frymë, e proporcionuar kjo me
numrin e përgjithshëm të popullsisë, është një arritje e
konsiderueshme.

Shqipëria merr pjesë në operacionet e organizatës së Kombeve të
Bashkuara në Çad, dhe është e vendosur që të shtojë praninë e saj në
operacionet paqeruajtëse në kuadrin e kësaj organizate.