Njeriu i historisë!

Arsene Wenger është bërë menaxheri me shërbimin më të gjatë në histori të Arsenalit të enjten, duke festuar 13 vjet në klub, të cilin e ka transformuar në njërin prej ekipeve më të mira në Angli dhe në botë.

Edhe pse Arsenal nuk e ka fituar Ligën e Kampionëve në drejtimin e tij apo ndonjë titull në katër sezonet e fundit, ai kurrë nuk ka qenë larg konkurrencës për titujt më të rëndësishëm dhe sigurisht se do të jetë i përfshirë në garë për trofe edhe këtë sezon.

Pas dy humbjeve të njëpasnjëshme në ndeshje të Premierligës nga Manchester United dhe Manchester City, Arsenal ka fituar pesë takime, ndërsa është favorit për përballjen me Blackburnin këtë fundjavë. Fitorja do ta dërgojë Arsenalin në mesin e liderëve aktualë.

Më herët gjatë kësaj jave, Wenger kishte thënë se Arsenali bëri rrezikim të madh në emërimin e tij 13 vjet më parë, kur e përditshmja angleze London Evening Standard kishte komentuar ardhjen e tij me titullin: “Arsene kush?”.

Nuk shkoi gjatë për ata të cilët nuk kishin dëgjuar për sukseset e tij në Monaco dhe Nagoya Grampus Eight të vërejnë aftësitë e tij pasi udhëhoqi klubin drejt titujve të FA Cup dhe Premierligë në sezonin e tij të plotë në drejtim më 1997-98. Nën drejtimin e tij Arsenal e fitoi Premierligën edhe në sezonet 2001-2002 dhe 2003-04, ndërsa FA Cup edhe më 2001–02, 2002–03, 2004–05. Arsenal ishte finalist i Ligës së Kampionëve më 2006, por u mposht nga Barcelona 1-2.