Frika nga Bambi

Bordi i Federatës së Basketbollit të Kosovës (FBK), të shtunën licencoi tetë skuadra për pjesëmarrje në edicionin e ri të Superligës së Kosovës në basketboll, në mesin e tyre edhe klubin serb Bambi.

Skuadra nga veriu i Mitrovicës është licencuar në momentet e fundit, pasi Departamenti i Sportit i Ministrisë së Sportit është zotuar se do t’i kryejë shpenzimet e këtij klubi për të garuar i qetë.

Klubi serb nga Mitrovica edhe më parë ka garuar në elitë, por aspak nuk ka qenë serioz. Në edicionin e fundit kjo skuadër qe përjashtuar nga Komisioni i Garave i FBK-së nga Superliga, pasi nuk paraqitej në ndeshjet kampionale.

Mirëpo kjo nuk ishte hera e parë, pasi Bambi nga garat ishte tërhequr edhe në sezonin 2007/08. Në të dyja këto raste çrregulloheshin edhe garat kampionale, ngase pas tërheqjes së Bambit, në çdo xhiro një ekip i Superligës do të duhej të pushonte.

Skuadrat e tjera të Superligës, e veçmas ato më mëdha, si Sigal Prishtina, Big Brother Bashkimi, Peja e Trepça i ka kapur qysh tani frika se mos Bambi po tërhiqet edhe kësaj here nga garat, me ç’rast më së shumti po pësojnë ekipet e lartpërmendura.

Drejtori i Sigal Prishtinës, Ismet Karaxha shpreson që Bambi të mos e përsëritë edhe këtë edicionin, ‘zakonin’ e vet – lënien e garave në gjysmë.

“Shpresoj që Bambi të mos i lërë garat në gjysmë, pasi Ministria e Sportit është zotuar që do t’ia kryejë shpenzimet për pjesëmarrje në gara. Kur një ekip po i lë garat në gjysmë, atëherë edhe Liga po e humb seriozitetin që duhet ta ketë”, deklaroi Karaxha për Express.

“Kur një ekip po tërhiqet nga garat, atëherë skuadrës tjetër po i bie të pushojë dy javë, me ç’rast ekipi po bie edhe nga forma. Po ashtu, skuadrat të cilat po përforcohen me lojtarë të huaj, po humbasin shumë, sepse ata lojtarë po vijnë, po paguhen për të luajtur dhe më pas po rrinë, sepse nuk po kanë kundër kujt të luajnë. Me këtë rast po humbim më së shumti ne klubet, sepse nuk po e nxjerrim maksimumin nga lojtarët e huaj, për çka edhe i paguajmë”, shtoi Karaxha.

Njëjtë si Karaxha është shprehur edhe trajneri i BB Bashkimi, Jeton Nixha. “Bambi është e mirëseardhur në Superligën e Kosovës. Shpresoj t’i zgjidhë ato probleme financiare dhe t’i çojë garat deri në fund. Kur një ekip tërhiqet nga garat, normalisht që edhe Liga po dëmtohet”, tha Nixha.

Në anën tjetër, për dallim nga Karaxha e Nixha, zyrtari i lartë i Trepçës, Kemajl Muja mendon se rivali lokal as që do t’i nisë garat.

“Unë mendoj që Bambi as që do të mund t’i nisë garat, sepse pret të marrë fonde nga Ministria e Sportit. Ministra dhe institucionet e tilla kur japin të holla, atëherë shkon një procedurë e gjatë. Kurse kampionati nis të shtunën dhe Bambi nuk do të ketë mjete ta fillojë edicionin. Por nëse ndodh kjo, atëherë FBK-ja duhet shpejt ta zëvendësojë Bambin me një ekip nga Liga e parë, sepse më pas po pësojmë ne ekipet e tjera”, tha Muja.

Pas tërheqjes së shortit, në xhiron e parë Bambi do të takohet me Kosovën e Vushtrrisë.