Ilir Dashi i LSI, kreu i ri i QSUT-së. Vasili: Do përmbushë misionin

TIRANË- Në krye të Qendrës Spitalore Universitare në Tiranë vendoset Ilir Dashi,
anëtar i komitetit drejtues të LSI-së. Prezantim i është bërë sot nga ministri i Shëndetësisë, Petrit Vasili, i cili deklaroi se drejtori i ri do të përmbushë më së miri misionin që i është ngarkuar.

Duke folur me nota shumë pozitive për aktivitetin dhe përkushtimin e Dashit, Vasili shtoi se do të bëhen përpjekjet maksimale për realizimin e reformës në shëndetësi dhe disiplinimin e këtij sektori kaq jetik.

Ilir Dashi zëvendëson në detyrë Gjeorgjina Kulin, që mbante këtë post që nga koha kur në krye të Shëndetësisë ishte Anila Godo.


Drejtori i ri i qendrës më të madhe spitalore në vend është ekonomist në profesion, por që prej vitesh merret me biznes. Ilir Dashi ka ekskluzivitetin e kompanisë amerikane 'Orbit' në Shqipëri dhe Kosovë.

CV-ja e Ilir Dashit

Lindur më 3 Maj 1956, në Tiranë, i martuar dhe baba i 2 fëmijëve.

Universiteti i Tiranës, Fakulteti i Ekonomisë (Ekonomi Politike) (1976-1980).

Kurse pasuniversitare për menaxhim, marketing, drejtim-organizim.

Përvoja e punës:

Organet e pushtetit qendror deri në vitin 1990.

Pedagog në Universitetin e Tiranës, Fakulteti i Ekonomisë.

Aktualisht, drejtor i "Orbit".