Mimoza Veliu: "Nuk ekzistojnë fotografi të rastit"

E lindur në Tetovë por jeton në Berlin ku edhe ka mbaruar studimet për media-dizajn dhe momentalisht punon si fotografe. Mimoza Veliu, vitin e kaluar e ka fituar çmimin “Gjon Mili” për fotografinë artistike më të mirë në Galerinë e arteve në Prishtinë. Është nënë e Jonit, i cili ka pesë vjet, për të cilin thotë se është gjëja më e shtrejtë në botë. “Bashkpunimi me galerinë “Qendra e parë” ishte shumë e këndëshme dhe e suksesshme.

Prezentimi im ishte i ndihmuar edhe nga Ministria e Kulturës e Maqedonisë dhe hapja e galerisë ishte gjithashtu një sukses i madh. Deri në fund të vitit duhet të paraqitem edhe me dy prezentime në Berlin dhe Shtutgart, derisa për vitin 2010 akoma mbetem në dilemë se ku do të paraqitem”, tregon Mimoza. “U shpërngula në Berlin që nga viti 2002. Ky qyteti është si magnet për shumë artistë dhe ofron shumë mundësi pune për multikulturën, edhe pse dëshira ime është që të jetoj edhe në ndonjë qendër tjetër artistike nëpër Europë”. “Berlini do të jetë stacioni im që gjithmonë do të qëndroj. Erdha këtu për të studiuar.

Regjistrova në fillim shkencat politike, por dalë ngadalë humbi dëshira për të vazhduar studimet e shkencës derisa tek unë lindi dëshira për të studiuar artin. Përpara se të vij në Gjermani, kam botuar edhe librin tim me poezi në kuadër të financimit nga Ministria e Kulturës në atë kohë”. “Vitet e para të qëndrimit në Gjermani ishin shumë të vështira derisa mundësia për të shkruar zvogëlohej”. “Unë mundohesha që të gjej ndonjë drejtim tjetër ku do të shuaj kureshtjen time.

Vazhdoja të ndjek kurse për fotografim. Kështu edhe e inspirova veten në një degë tjetër që më vonë edhe u bë profesioni im”. “Në fillim, fotografoja më të afërmit e familjes dhe djalin tim, ata ishin shumë të kënaqur. Disa nga ato fotografi, më vonë ishin edhe pjese e prezentimit tim nëpër galeri të arteve. Me kalimin e kohës fillova të fotografoj edhe modele, pasi kontakti im me agjensione të modelimit ritej dhe kështu ky bashkpunim ishte shumë i frytshëm. Njerëzit janë ata që më inspirojnë më shumë në fotografim, në kombimim me natyrën dhe gjithçka që na rrethon”, përfundon rrëfimin e saj Mimoza Veliu artisja shqiptare në Gjermani.