Ari Han, asnjë ndryshim në listë (kampionati boteror 2010)

Grupi fitues nuk ndryshohet. Trajneri holandez Ari Han e ka pasur parasysh këtë. Asnjë ndryshim në listën e lojtarëve. Janë të njëjtët futbollistë që ia dolën të ndalin Suedinë e Zlatan Ibrahimoviçit në barazimin e madh 0-0 në Tiranë dhe fituan pastër 3-0 kundër Maltës së Majkëll Mifsudit në "Qemal Stafa", duke marrë edhe kryesimin e përkohshëm të Grupit 1. Tri pikë edhe ishin besuar se do të merreshin nga trajneri Han në dy përballjet e para zyrtare (fitorja me Maltën), por pika kundër Suedisë, mund të konsiderohej më shumë se një guxim para 90 minutave të luajtura, më 6 shtator 2009, në ndeshjen hapëse të eliminatoreve të Botërorit 2010.

Renditja

Befasisht Shqipëria kryeson me meritë Grupin I të zonës evropiane, të konsideruar edhe si "Grupi i ferrit", pasi për dy vendet e para luftojnë tri skuadra të mëdha: Portugalia, Suedia e Danimarka. Shqipëria mbërrin në ballafaqimin me Hungarinë në Budapest me tri pikë më shumë se kundërshtari. Kombëtarja jonë fitoi në ndeshjen e fundit kundër Maltës (3-0, gola të Bogdanit, Duros e Dallkut), ndërkohë që Hungaria humbi në Suedi 2-1.

Sfidë holandeze

Hungari-Shqipëri është një "sfidë e tëra holandeze", parë dhe faktin se trajnerët e dy përfaqësueseve, si Ervin Kuman ashtu dhe Ari Han, i përkasin kësaj shkolle. Gjithsesi, Han duket se ka një armë më shumë se kundërshtari. Përvojën si trajner përfaqësuesesh, por edhe ndihmën e një "spiuni" të regjur si djali i tij, Advin Han. Han Junior ndoqi Suedi-Francë (2-3) e më pas Maltë-Portugali (0-4), duke i ofruar të atit të tij të dhëna të konsiderueshme.

Lista e Kombëtares

Portierë: Arjan Beqaj (Anorthosis), Isli Hidi (Alki Larnaka), Ilion Lika (Terek Grozni);
Mbrojtës: Armend Dallku (Vorskla), Kristi Vangjeli (Aris), Debatik Curri (Vorskla), Endri Vrapi (Elbasani), Andi Lila (Tirana), Elvin Beqiri (Vllaznia), Admir Teli (Haçetepespor), Ansi Agolli (Tirana); Mesfushorë: Lorik Cana (Marsejë), Altin Lala (Hanover 96), Klodian Duro(AC Omonia), Ervin Skela (Energi Kotbus), Elis Bakaj (Partizani), Jahmir Hyka (Mainz 05), Ervin Bulku (Krivbas);
Sulmues: Edmond Kapllani (Karlsruhe), Hamdi Salihi (SV Ried), Besart Berisha (Rozenborg), Erjon Bogdani (Kievo).

Duro: Hungarisë do t'i tregojmë "dhëmbët"

Mesfushori kuqezi ka lënë pas dëmtimin dhe tani mendon se Shqipëria ka shanse për një rezultat historik të shtunën

Dëmtimi i përket së shkuarës për mesfushorin Klodian Duro. I kthyer në njeriun-gol të Omonias, futbollisti 31-vjeçar tani kërkon të bëjë të pamundurën për kombëtaren, në përballjen e radhës eliminatore me Hungarinë. "Isha i sigurt në riaftësimin tim. Nuk mund të humbisja ndeshjen me Hungarinë,"- tregon Duro në linjë telefonike nga Budapesti. Ashtu si kuqezinjtë e tjerë, edhe mesfushori është tepër optimist për këtë sfidë, ku, sipas tij, është momenti që Shqipëria të tregojë "dhëmbët". Për këtë, gjendjen e ekipit, kundërshtarin, por jo vetëm, Klodian Duro shprehet në intervistën e dhënë dje për "Sportin shqiptar":

- Klodi, së pari, si ju duket gjendja e ekipit në prag të ndeshjes?

- Eshtë një gjendje shumë e mirë, ku përveç kësaj ka edhe një optimizëm të madh nga të gjithë ne. Ekipi duket në formë dhe i gatshëm për të bërë më të mirën.

- Dëmtimi që pësuat në ndeshjen me Mançester Sitin, duket i kaluar, apo jo?

- Natyrisht që po. Ishte problemi i gjurit dhe nuk duhet të rrezikoja, por për fat të mirë u riaftësova në kohë. Klubi nuk kishte dëshirë që unë të rrezikoja, por kombëtarja është shumë e rëndësishme dhe unë nuk mund të humbisja ndeshjen me Hungarinë. Fola edhe me presidentin e Omonias dhe ai më mirëkuptoi, por natyrisht dihet që secili shikon interesat e veta dhe klubi do që unë të jem sa më mirë.

- E shtuna erdhi. Cili është komenti juaj për Hungarinë?

- Pas një fillimi të mirë, tani duhet vazhdimësi. Me Hungarinë duhet të bëjmë lojën që zhvilluam ndaj Suedisë. I kemi forcat për të treguar se kush jemi përballë kësaj Hungarie. Por duhet të jemi shumë të përqendruar në lojë. Hungaria ka disa individualitete të mira, që mund ta zgjidhin ndeshjen, por nëse ne bëjmë lojën tonë, natyrisht që do të marrim një rezultat pozitiv. Edhe Suedia kishte Ibrahimoviçin, por ngeci në Tiranë.

- Atëherë, si duhet t'u kundërviheni hungarezëve?

- Do ta mundim me lojën tonë të grupit, për t'i treguar këtij ekipi se sa të fortë jemi kur luajmë të disiplinuar. E kemi treguar disa herë këtë, edhe ndaj ekipeve nmë të forta, por edhe të shtunën kam shumë besim se do të arrijmë një rezultat historik. Eshtë momenti më i mirë për ta bërë këtë dhe jam i bindur se do ta realizojmë.

- Çfarë ju ka kërkuar Ari Han në prag të sfidës?

- Që të kemi besimte forcat tona, pasi edhe ai ka shumë besim te ne. Duhet të luajmë pa frikë, pasi i kemi të gjitha mundësitë për ta mposhtur këtë kundërshtar. Trajneri na ka kërkuar që të jemi shumë të përqendruar gjatë lojës dhe të kontrollojmë mirë kundërshtarin tonë personal, pra mos të lëmë hapësira.

- Ka ndikuar kryesimi i grupit për moralin e ekipit?

- Natyrisht që ka ndikuar pozitivisht. Por nga ana tjetër, ne duhet të jemi dyfish të përgatitur, pasi kundërshtari të shikon ndryshe, edhe pse shumëkush mund të mendojë që ky është një vend i përkohshëm. Gjithsesi, mendoj se Hungaria do të na vlerësojë shumë dhe duhet të japim gjithçka. Nuk e kemi luksin për t'u treguar euforikë, edhe pse shpresojmë shumë që ky pozicion që kemi, të zgjasë sa më shumë.

Han s’e ka frikë Hungarinë luajmë me skemë ofensive

Shqipëria do të luajë sërish me një skemë sulmuese, ashtu sikurse ndodhi edhe në ndeshjen kundër Maltës, ku kuqezinjtë arritën të fitonin 3-0. Në sulm do të jetë i vetëm Erjon Bogdani, por do të ketë pas shpine tre mesfushorë me tipare ofensive si Ervin Skela, Klodian Duro dhe Jahmir Hyka. Formacioni i Shqipërisë për ndeshjen e nesërme kundër Hungarisë pritet të mos ketë ndryshime për sa i përket ndeshjes kundër Maltës, me përjashtim të Elvin Beqirit, që është rikuperuar plotësisht dhe është gati të rikthehet titullar në qendër të repartit të mbrojtjes, përkrah Debatik Currit.

Ari Han po mendonte të spostonte Lorik Canën në vend të tij, por nuk ka vendosur përfundimisht sepse mbrojtësi shkodran ia ka dalë mbanë. I vetmi dyshim është krahu i majtë i mbrojtjes, ku në duel janë Kristi Vangjeli me Ansi Agollin. Agolli, i cili luajti si titullar në ndeshjen kundër Maltës, ka një epërsi të lehtë për shkak se është aktivizuar rregullisht gjatë kësaj periudhe, megjithatë, nuk e ka të sigurt vendin e titullarit.

Në të djathtë të mbrojtjes do të luajë Armend Dallku. Në mesfushë nuk pritet të ketë ndryshime, pasi Duro është rikuperuar dhe do të jetë i gatshëm për këtë ndeshje. Ai e ka fituar duelin me Besart Berishën për një vend në krahun e djathtë, ndërsa Skela pritet të luajë në qendër. Jahmir Hyka gjithashtu pritet të luajë si titullar në krahun e majtë, për të ndihmuar Erjon Bogdanin në qendër të sulmit. Alternativat për të bërë freskuar pjesën sulmuese të ekipit në pjesën e dytë janë Besart Berisha dhe Edmond Kapllani.

Për këtë të fundit do të jetë një mundësi e mirë kjo ndeshje që të fitojë besimin e trajnerit Han dhe të korrigjojë gabimin që bëri në grumbullimin e fundit, kur goditi me shkelm në mënyrë të vullnetshme Debatik Currin. Ky veprim i pamatur i kushtoi jo pak lojtarit, i cili përfundoi në tribunë.

Kuman dërgon "spiunë"

Seancën e djeshme stërvitore e kanë ndjekur edhe dy të dërguar të trajnerit të Hungarisë, Ervin Kuman. Lajmin e bënë të ditur burime pranë stafit të përfaqësueses shqiptare. Ndërkaq mësohet se trajneri i përfaqësueses shqiptare iu ka tërhequr vëmendjen lojtarëve të tij edhe në seancën e djeshme stërvitore. Holandezi iu ka kërkuar futbollistëve shqiptarë që të mos e teprojnë me mbajtjen e topit dhe të jenë sa më të lëvizshëm në fushën e lojës dhe kur janë pa top. Një kërkesë të tillë Han ua ka përsëritur vazhdimisht lojtarëve të Kombëtares edhe në grumbullimet e mëparshme. "Nuk dua që të rrezikojmë kot.

Kur unë them se ju duhet të lëvizni shumë pa top, atëherë duhet ta bëni këtë gjë. Përpiquni të pasoni sa më shumë topin dhe të mos e mbani shumë atë", mësohet t'u ketë thënë tekniku lojtarëve në stërvitjen e zhvilluar pasdite.