Danish Jukni, piktori shkodran me stil perëndimor!

I lindur në qytetin e Shkodrës në qershor të vitit 1934, Danish Jukni, falë edhe kulturës së mirëfilltë që gëzonte familja e tij tregtare në qytetin verior, që në fëmijëri do të spikaste për talentin e tij në fushën e pikturës.



Edhe pse është ndarë nga jeta gjashtë vite më parë në moshën 69 vjecare, Shkodra dhe shkodranët nuk e kanë harruar asnjëherë piktorin e madh Danish Jukni, artistin e mirënjohur që falë talentit dhe stilit perëndimor të punimeve të tij, ka lënë gjurmë të pashlyeshme tek artëdashësit.

Këto ditë bashkia e Shkodrës e mbështetur nga miqtë dhe kolegët e tij ka çelur në Galerinë e Arteve Figurative të qytetit. një ekspozitë me disa prej punimeve më të mira ndër vite të Danish Juknit.

Petriti, nipi i tij, një nga volejbollistët më të mirë të Vllaznisë thotë se ia kanë borxh axhës (xhaxhait) të tyre ta përkujtojnë tani që ai nuk jeton më.

"Mënyra më e mirë për ta kujtuar ishte hapja e kësaj ekspozite ku me këtë rast u mblodhën pjesa më e madhe e shokëve, miqve dhe ish kolegëve të tij, jo vetëm këtu në Shkodër, por edhe nga Tirana dhe rrethet e tjera të Shqipërisë", thotë Petriti duke theksuar se familja "Jukni" është krenare për Danishin, pasi prej tij, sidomos nipërit dhe mbesat kanë mësuar shumë.

Petriti dëshiron të kujtojë se tek axha i tyre, edhe gjatë periudhës së diktaturës kanë parë vazhdimisht pikëpamje demokratike dhe perëndimore, pikëpamje këto që me veprat e tij ia ka përcjellë edhe publikut të gjerë.

"Ne jemi në hapat e parë dhe po fillojmë të nxjerrim diçka nga puna e tij, pasi shumë nga veprat me të cilat ai ka marrë titujt, ndodhen në Galerinë e Arteve Tiranë apo zbukurojnë institucione të rëndësishme të vendit" të thotë Petriti.

I lindur në qytetin e Shkodrës në qershor të vitit 1934, Danish Jukni, falë edhe kulturës së mirëfilltë që gëzonte familja e tij tregtare në qytetin verior, që në fëmijëri do të spikaste për talentin e tij në fushën e pikturës.

Talentin e tij do ta zbulonte fillimisht piktori i mirënjohur Zef Kolombi, dhe mësimet e para të pikturës i mori pikërisht prej tij. Prindërit e tij, duke dalluar talentin e të birit vendosnin që Danishi të shkollohej për pikturë pranë Liceut Artistik "Jordan Misja" në Tiranë, e fill pas saj në Akademinë e Arteve të Bukura në Krakov të Polonisë.

Pas kthimit në Shqipëri, Danishi do të vijonte punën e tij në Tiranë e më pas në Shkodër në vitet e mëpasshme duke treguar nivelin e një piktori bashkëkohor.

Bashkëudhëtare me të në që prej viteve të kthimit nga Polonia do të ishte edhe vajza polake Danuta, bashkëshortja e tij, e cila u bë një nga mjeket pediatre më të njohura në Shkodër.

"Ajo ka qënë syri i parë që shikonte pikturat e mia dhe, meqë njihte preokupimiet e lexonte të njëjtat libra si unë, gjithmonë më thoshte diçka. Edukaka, kultura dhe kërkesat e saj të larta si mjeke, më krijonin një atmosferë të tillë ku unë e ndjeja veten si banor i botës perëndimore. Mandej i kishim të njëjta edhe pëlqimet, lulet, kafshët, malet, detin." shprehet danishi për bashkëshorten e tij, në një intervistë të dhënë sa ishte gjallë, të cilën na e servir Petriti, nipi i tij.

"Piktori Danish Jukni shquhet për penelatë në koloristike, e cila është edhe është edhe karakteristikë e punimeve të tija në vite duke i dhënë një ekspozim të drejtpërdrejtë dekorativitetit elegant dhe sensual." thotë piktori i vjetër shkodran Ndoc Gurashi, teksa viziton ekspozitën e mikut të tij që sot nuk jeton mëduke shtuar se "piktura e tij përcillet përmes një gjuhë stilistike të përpunuar dhe një hapësire koloristike që aplikohet më së shumti nga brezi i piktorëve bashkëkohës".

Danish njihet si një artist që u përqendrua kryesisht në pikturat me subjekte edhe me ndjesitë e menjëhershme, të pavarura e të shkëputura nga hapësira socialiste duke pasqyruar realitetin e figurave të natyrës humane dhe të sendeve, duke u nisur nga estetika e ngjyrave dhe nga një mendësi artistike krejt e shkëputur nga fryma e metodës ideologjike.

Sipas Gurashit, në ekspozitën e paraqitur këto ditë përpara artdashësve shkodranë, e cila do të qëndrojë e hapur deri në fund të muajit nëntor, janë paraqitur punime të viteve të ndryshme të Juknit, në të cilat zënë vend të rëndësishëm punimet e realizuara gjatë kohës që ai studiuonte për pikturë në Poloni, pjesë e së cilës janë edhe nudot dhe shumë punime të tjera të periudhës deri në vitin '90-të.

Ndërkohë, Zhaneta Kadilllari, ish nxënëse e Juknit shprehet e emocionuar se "mënyra e komunikimit me profesor Danishin, ishte diçka krejt e veçantë. Sapo pashë pikturat e paraqitura në ekspozitë, m'u kujtuan ato vite kur me profesorin dikutonim gjatë. "Janë me të vërtetë kujtime të bukur që nuk nuk do ti harroj lehtë nisur nga ajo thjeshtësi dhe mënyra pedagogjike që ai aplikonte me studentët e tij, të cilët të gjithë padyshim që i janë mirënjohës" shprehet ajo.

Sipas piktorit të njohur Sali Shijaku "Danish Jukniu ishte dhe mbetet një nga piktorët më të shquar të gjysmës së dytë të shekullit të njëzetë për artin tonë figurativ. "Në të gjithë krijimtarinë e tij ai sillte gjithmonë diçka të veçantë, sillte pak dritë në artin e realizmit socialist të asaj kohe" shprehet ai.

"Piktori Danish Jukni është një emër i nderuar në artin shqiptar për veprën e tij e cila dallohet për një qartësi të madhe filozofike dhe vlera të rralla estetike" shprehet duke shijuar ekspozitën e mikut të tij skulptori Muntaz Dhrami. Sipas tij, pikturat janë në themelet e artit bashkëkohor shqiptar për vlerën e konsiderueshme estetike, me të cilën ai trajtoi kompozimin, portretin natyrën e qetë.

"Ai iku në një moshë relativisht të re, iku pas një vuajtjeje dhe lëngate të gjatë, dhe kjo humbje e tij sikur na rëndon edhe më tepër. Por jam i bindur se vepra e tij do të jetë në kujtesën e njerëzve, sepse vepra e tij është ngritur në emocionet e popullit" përfundon skulptori Muntaz Dhrami