Basha: Përgjigje të merituar thirrjeve për dhunë

Policia do të garantojë zhvillimin e protestave paqësore, por dhuna dhe
thirrjet për dhunë do të marrin përgjigjen që meritojnë. Kështu u
shpreh dje Ministri i Brendshëm, Lulzim Basha, gjatë një aktiviteti të
policisë ku merrte pjesë edhe ambasadori amerikan, Xhon Uidhërs.
“Policia e Shtetit ka garantuar dhe do të vazhdojë të garantojë në
mënyrën më të plotë të drejtat kushtetuese të çdo qytetari dhe të çdo
force politike për protesta paqësore. Dhuna dhe thirrjet për dhunë do
të marrin përgjigjen e merituar ligjore”, tha Basha. Sipas tij
“aktivizimi i kontigjentit kriminal nuk do të tolerohet. Ndaj bëj
thirrje që të shkurajohet dhe të hiqet dorë nga aktivizimi i këtij
elementi kriminal, përndryshe pa asnjë pikë hezitimi mbi ta do të vijë
dora e rëndë e ligjit”. Gjatë ceremonisë së dhurimit të disa pajisjeve
për trajnime mbi taktikat mbrojtëse të programit ICITAP Basha tha se:
“Ligji “Antimafia” dhe ligji për konfiskimin e pasurive jane mjete të
reja ligjore në luftën e pashtershme të Policisë së Shtetit kundër
krimit të organizuar. Një fazë e re ka nisur në luftën kundër mafias.
Kjo luftë do të fitohet nga Policia e Shtetit. Në bashkëpunim me
partnerët tanë ndërkombëtarë, në javët dhe muajt e ardhshëm, ne do të
intensifikojmë goditjen ndaj krimit të organizuar duke shënuar nivelet
më të larta të kësaj lufte”.