12 kundër Adelinës!

Këngëtarja Adelina Ismajli duket se nuk është e adhuruara e këngëtarëve, së paku të atyre që kanë marrë pjesë në festivalin “Kënga Magjike 2009”. Sipas një burimi të afërm me këtë festival, ajo është vlerësuar me zero pikë nga 12 këngëtarë të këtij festivali, përderisa ka pasur zëra se ajo nuk është vlerësuar sa e ka merituar nga kolegët e saj. Ende nuk dihet se si ka qenë vlerësimi i këngëtarëve kosovarë për Adelinën, edhe pse thuhet se ata nuk kanë i kanë dhënë asaj votat maksimale.

Adelina Ismajli, e cila në këtë festival u paraqit e veshur në kilota dy javë më parë, në natën finale u paraqit e mbuluar dhe bëri “shaka” me producentin e këtij festivali Ardit Gjebrea, të cilit i tha se kur kishte dalë “ajo e zhveshur në skenë, Lady GaGa ka qenë e vogël”.

Kënga e saj “Nuk ngec” ka bërë shumë adhurues në Shqipëri, përderisa mësohet se ajo ka pasur edhe një numër të madh të votave që ka marrë nga publiku.

Pavarësisht kësaj ende nuk ka ndonjë reagim të Adelinës në lidhje me këtë.

Para festivalit kishte pasur thashetheme se ajo është fituesja e këtij festivali dhe se gjithçka ishte përcaktuar qysh më parë.

E ashtuquajtura pop-mbretëresha shqiptare kohëve të fundit nëpër media ka hedhur edhe një spot të ri, i cili është realizuar në një diskotekë të Zvicrës.

Tani ka zëra se ajo është në përgatitje të një albumi të ri, ndërkaq disa këngë të reja të saj pritet t’i shohim edhe gjatë programeve të Vitit të Ri.