Idoli i shtresës!

Nuk ishte ndonjë politikan me nam botëror në Kosovë. As ndonjë aktor apo aktore e madhe, siç ishte Nicole Kidman, por ishte një aktor turk, i cili sapo ka kryer shërbimin ushtarak, ka luajtur në një TV seri dhe në një film të metrazhit të gjatë. Megjithatë, ai është pritur mirë në Kosovë, përderisa qindra adhurues të tij, kryesisht tinejxherë, kanë përballuar të ftohtit në Prishtinë për t’u takuar me aktorin.

Ky është aktori turk Kenan Imirzalioglu, i cili tha para medieve se kur e kishte luajtur rolin e Mehmetit, regjisori i kishte thënë atij se do të jetë i njohur shumë në Kosovë.
“Kur kam luajtur në serialin ‘Jetë e hidhur’, regjisori më tha se do të bëhem shumë i njohur në Kosovë. Këtë fakt po e vërtetoj tani këtu”, ka thënë Kenani.

Sipas tij, tani është më shumë i fokusuar në promovimin e filmit të tij të metrazhit të gjatë “Kapadai”, një film ky në të cilin luajnë edhe aktorë të tjera.

I pyetur nga gazetarët pse asnjëherë nuk e ka puthur Nermimin në film, Mehmet Kosovali ka thënë se “nuk i është dhënë rasti”.

“Ashtu janë krijuar rrethanat”, ka thënë ai.

Mehmeti thotë se shqiptarët, konkretisht kosovarët, i kishte njohur në Turqi si një popull, që luftojnë për të arritur qëllimet e tyre.

“Në Turqi kam takuar shumë shqiptarë, të cilët njihen për karakterin e tyre luftarak në arritjen e qëllimeve. I tillë ka qenë edhe roli im në këtë film. Mehmeti lufton për të arritur qëllimet e tij. Ai ndihet i tradhtuar nga e dashura e tij dhe në fund e fiton luftën”, thotë ai.

Megjithatë, në Kosovë nuk ka arritur të vijë edhe një idol tjetër i kosovarëve – Nermini, dhe për këtë nuk ka folur askush.

Mehmet Kosovali nuk ka ditur të flasë asnjë fjalë shqip, por ai ka thënë se e di një, që është shumë interesante “Kosova”.

Ai nuk ka folur për jetën private të tij, por ka treguar se kohëve të fundit ishte në Turqi për shërbim ushtarak.

Idhulli i kosovarëve nesër pritet ta vizitojë Prizrenin dhe Mamushën, ndërkaq vizitën e tij pritet ta përfundojë të dielën eventualisht të hënën.

Biografia e Kenanit

Aktori Kenan Imirzalioglu ka lindur në Ankara në vitin 1974. Përpos “Jetë e hidhur” në të cilin luan rolin e Mehmet Kosovalisë, karrierën si aktor e ka filluar në vitin 1999 në emisionin televiziv "Deli Yurek”. Pas këtij është shfaqur në filmat: "Alacakaranlik", “Yazi tura”, "Ezel", etj. Filmi i tij që është përfunduar dhe nuk është shfaqur është “Ejder kapani”, i cili pritet të jepet.