Nga 1 janari 2010, presidenca e BE i kalon spanjollëve

Presidenca e radhës së BE-së, që nisi më 1 janar 2010 duhet ta ndajë
për herë të parë punën me dy përfaqësues të rinj të përhershëm të BE.
Spanjollët megjithatë flasin për një bashkëpunim të ngushtë.



Është zhdukur pasiguria për procesin e reformave të Lisbonës

Se sa ka ndryshuar Bashkimi Evropian vetëm brenda një gjysëm viti mund
të kuptohet nëse i kthehemi fillimit të presidencës suedeze të radhës.
Në fund të qershorit Ministrja suedeze për Evropë, Cecelia Malmström i
pati shpallur prioritetet e vendit të saj për gjashtë muajt e ardhshëm.

"Ne jemi të gjithë shumë të vetdijshëm se kjo është një presidencë e
vështirë. Duhet të konstituohet parlamenti i ri, të ndërrohet
komisioni, e pranishme është pasiguria për kornizën institucionale që
ka të bëjë me mundësinë e një referendumi të ri në Irlandë dhe ne kemi
krizën ekonomike".

Vetë kriza ekonomike sot nuk duket aq dramatike si atëherë. Para së
gjithash është zhdukur pasiguria e madhe se si do të shkojnë punët më
tutje me procesin e reformave të Lisbonës. Marrëveshja e Lisbonës tani
ka hyrë në fuqi. Dhe presidenca spanjolle është e para në BE me Herman
van Rompuy-n si president të përhershëm të Këshillit dhe me Catherine
Ashton si përfaqësuese e lartë e Unionit për politikën e jashtme dhe të
sigurisë. Ashton do të ketë tani më shumë kompetenca. Në këtë mënyrë
presidenca spanjolle e radhës humb relativisht si për nga pesha ashtu
dhe për nga rëndësia. Megjithatë spanjollët janë të gatshëm që ta
pranojnë lehtë këtë ndryshim. Edhe Ministri i Jashtëm i Spanjës Miguél
Angel Moratinos u tregua modest dhe me pak ironi foli për vetveten në
veten e tretë:

"Ministri iJashtëm spanjoll është në dispozicion të plotë të zonjës
Ashton. Ai mund t'i shërbej asaj atje ku ai për shkaqe historike dhe
përvojës, pra afërsisë gjeografike ka më shumë përvojë si në Lindjen e
Mesme, në Amerikën Latine, në Afrikën e Veriut, në hapësirat e Detit
Mesdhe. Atje mund të bashkëpunohet".


Spanjollët duan ta çojnë përpara zgjerimin e BE-së

Dhe disa nga këto përvoja të posaçme do të jenë disa nga temat qendrore
të presidencës spanjolle. Në veçanti sa i përket Lindjes së Mesme,
shefi i diplomacisë spanjolle Moratinos shkoi shumë larg:

"Parashikimet e mia, ëndrra ime dhe angazhimi im është të punojë që
në në vitin 2010 ne të kemi përfundimisht një shtet palestinez i cili
do të jetonte në paqe dhe siguri me Izraelin. Pse duhet të presim më
gjatë?.

Spanjollët duan të çojnë përpara edhe procesin e zgjerimit.
Mundësisht gjatë presidencës së tyre ata dëshirojnë të përmbyllin
procesin e anëtarësimit të Kroacisë. Dhe qeverisë serbe, e cila dorëzoi
(22.12.) në Stokholm kërkesën për anëtarsim i pëlqen fakti që Spanja
është një prej vendeve të pakta të BE-së, që nuk e ka njohur Kosovën si
shtet. Beogradi vazhdon ta quajë Kosovën si pjesë të Serbisë. Moratinos
e ndjeu veten pak të ngacmuar kur u hap kjo temë në Bruksel:

"Ne spanjollët tërë kohën kemi qenë jashtëzakonisht konstruktiv në
këtë çështje me përjashtim të mosnjohjes së Kosovës. Ne i kemi arsyet
tona ligjore, por sot nuk është dita të diskutojmë për ato".

Arsyeja ka të bëjë me frikën e Madridit se duke njohur Kosovën do të mbështesë seperatizmin bask dhe katalanas në Spanjë.