Salihu shpall kandidaturën për kryetar federate

Ish-boksieri i mirënjohur, Aziz Salihu, shpall kandidaturën për kryetar të Federatës së Boksit të Kosovës. Ai në konferencën me gazetarë tha se ka qëllim që të bëhet kryetar i federatës dhe ta kthejë boksin nga e mbara. Salihu tregoi edhe arsyet pse e ka shpallur kandidaturën për kryetar federate. “Boksi është në krizë të madhe, i cili një kohë ka qenë numër një në Kosovë. Unë e kam shpallur kandidaturën për kryetar federate me synim që të çoj para këtë sport dhe iu garantojë se do të bëj edhe me sponsor gjeneral. Nëse unë bëhem kryetar të gjitha ata që punojnë në federatë do të bëj më paga si dhe boksierët e kombëtares së Kosovës do të iu krijojë kushte për punë dhe do t’i përgatiti edhe për Lojërat Olimpike që mbahen në vitin 2012”, tha Salihu. Përderisa Salihu ka shprehur kandidaturën për kryetar, në Federatë thonë se ai nuk ka paraqitur kurrfarë kërkese. “Kërkesën e kam paraqitur në federatë dhe nuk është e vërtetë çfarë thonë ata. Qëllimi i disa njerëzve në federatë është të më pengojnë, të mos më lejojnë që të marrë pjesë sepse i frikësohen Aziz Salihut.

Kërkoi që kryetari Ramadan Selimi të jap dorëheqje dhe mos të futet në ujërat e turbullta. Unë jam kandidat për kryetar, por është çështje e kuvendarëve se a më votojnë apo jo”, ka thënë Salihu. Ai shtoi: “Janë dy njerëz në federatë që pengojnë zhvillimin e boksit dhe luajnë me djersën e boksierëve. Boksi është në krizë dhe më së miri flet se disa boksierë e kanë lënë boksin, disa kanë ikur dhe vetëm është duke u shkatërruar. Kam kërkuar nga Departamenti i Sportit të Kosovës që të më bëjnë të mundur që të jem kandidat për kryetar sepse jam sportist i merituar. Nëse unë bëhem kryetar do t’i kthejë në boks të gjithë ish-yjet e boksit dhe do të punojmë së bashku për të mirën e këtij sporti”, tha Salihu. Nga ana tjetër, kryetari i Federatës së Boksit të Kosovës, Ramadan Selimi, i cili zyrtarisht është kandidat për ta rifituar postin e kryetarit për mandatin e ardhshëm katër-vjeçar, ka thënë se askush nuk ia ka ndaluar Salihut të jetë në kuvendin zgjedhor që mbahet të shtunën, në shtëpinë e sportit në Prishtinë, në orën 12.00. “Aziz Salihut askush nuk ia ka ndaluar që të jetë kandidat për kryetar të federatës, por ai është i mirëseardhur. Salihu duhet të ketë bazën deleguese të klubeve që përfaqësojnë federatën për t’u kandiduar për kryetar. Unë këtë se kam shpikur, por kështu është e rregulluar me statut të federatës”, ka thënë Selimi.