Sa ka investuar deri më tash KF Trepça?

“Shumë shpejt do të rregullohet edhe fusha ndihmëse, që do të jetë një kapital i madh për skuadrën e futbollit Trepça”, tha Eroll Vitaku, drejtor i KF Trepça.

Drejtori i klubit të futbollit Trepça nga Mitrovica, Eroll Vitaku, ka thënë se do të investohet sa më shumë që të bëjnë një skuadër sa më moderne dhe që të ia kanë lakmi edhe shtetet nga rajoni. Sipas Vitakut Trepça ka traditë dhe me investimet që po bëhen do të jetë njëra nga skuadrat që në edicionin pranveror edhe adhuruesve do t’i dhurojë futboll të bukur. “Synimi jonë që të bëjmë atmosferë impozante dhe rinia të kënaqet me artin e futbollit”, tha në fillim Vitaku. Trepça ka investuar mjaft shumë që se ka nisur kampionati i ri. “Kemi investuar 190 mijë euro prej se ka filluar kampionati i ri. Më një fjalë mesatarja në muaji i vjen 25-26 mijë euro. Investimet nuk do të ndalen, por do të investojmë sa më shumë për arsye që të bëjmë një skuadër të fortë dhe të modelit evropian”, tha Vitaku.

Kjo skuadër në radhët e veta deri më tash ka sjellë disa futbollist të dëshmuar, si Nuriman Ismajlin nga skuadra La Paz e Bolivisë, pastaj edhe Berat Hysenin nga Teuta e Durrësit, Patrik Doçin nga Liria e Prizrenit, Arbër Malajn nga Flamurtari i Vlotës si dhe në negociata janë edhe më një futbollist të dëshmuar në repartin e sulmit nga Maqedonia. “Më duket se i kemi plotësuar të gjitha repartet me futbollist dhe nuk kemi nevojë të sjellim edhe përforcime të tjera. Punojmë për shtigje të gjata dhe kjo më së miri e dëshmon edhe kontrata që kemi një vit e gjysmë e më shumë me 5-6 futbollist. Realisht çdo klub lufton për rezultate dhe trofe, por skuadra jonë do të ndërtojë lojë për t’i kënaqur adhuruesit e futbollit sidomos ‘Torcida” që janë adhuruesit më të mrekullueshëm”, tha Vitaku. KF Trepça, kampione vjeshtore me 32 pikë të tubuara ose dy më shumë se përcjellësi i saj, KF Hysi.

Mitrovicasit nga e hëna e ardhshme do t’i vazhdojnë përgatitjet në Shqipëri. “Pritet t’i zhvillojmë disa ndeshje miqësore në Shqipëri, me gjasë me skuadrën e Teutës së Durrësit, Besën e Kavajës, Apoloninë e Fierit, por nuk përjashtohet mundësia edhe me Partizanin e Tiranës. Në Kosovë kur të kthehem pritet të luajmë miqësore me Shkëndijën e Tetovës. Me 20 shkurt na pret ndeshja për kupën e Republikës së Kosovës përballë skuadrës së Gjilanit. Trepça ka synime që të përgatitet në të gjitha pikëpamje që të jemi të gatshëm për çdo sfidë dhe si kam deklaruar edhe më herët që ta kthejmë titullin pas 17 vjetëve në Mitrovicë”, nënvizoi Vitaku.

Drejtori të skuadrës me traditë i vjen keq që nuk e kanë edhe shkollën e fuqishme të futbollit dhe kjo nuk po ndodh për shkak të mungesës së fushës ndihmëse. Ai tha se në marrëveshje me strukturat komunale është projekti që fusha ndihmëse të ndërtohet në krahun e djathtë të stadiumit në mes të lumit Ibër. “Shumë shpejtë do të rregullohet edhe fusha ndihmëse, që do të jetë një kapital i madh për skuadrën”, tha Vitaku. Drejtuesit e Trepçës parësore kanë të rikthejnë shkëlqimin e dikurshme të kësaj skuadre, që dikur i tërë qyteti ka jetuar me rezultatet e saj.