“Prapë të dua”, klipi i parë i Viktorit!

E ka fort përzemër muzikën, prandaj që në hapin e parë të tij në këtë fushë ka zgjedhur të bashkëpunojë me emra tashmë të njohur të skenës së muzikës shqiptare. Ilir e Korab Shaqiri janë autorë të këngës së tij të parë me klip, të titulluar “Prapë të dua”. Këngëtari i ri, Viktor Zenuni, i lindur në Kaçanik, nga viti ’93 jeton me familjen e tij në Friburg të Zvicrës. Prej dy vitesh ka nisur profesionalisht rrugën e këngës, ndërkohë, krahas angazhimit për të sjellë këngë të reja dhe për të marrë pjesë në festivale, ai po mendon të vazhdojë studimet për muzikë, për të qenë profesionist në fushën të cilën ai e ka pasion.

Si ka filluar karriera juaj muzikore?

Viktori: Me muzikë kam filluar të merrem para dy vitesh. Po mendoj në mënyrë profesionale se më parë kam kënduar në manifestime të ndryshme në shkollë, por vetëm në gjuhën gjermane dhe me një grup që e kishim themeluar në shkollën tonë.


- Muzika për ju është...?

Viktori: Muzika për mua nënkupton gjithçka, që do të thotë e kam pasion dhe në të ardhmen profesion. Jam duke bërë përpjekje që të vazhdoj në shkollë të muzikës në mënyrë që të jem më profesional në këtë fushë, ndërkaq zhanri të cilin e këndoj është pop.

- Keni realizuar ndonjë klip?

Viktori: Deri tash kam realizuar një këngë me klip, e cila titullohet “Prapë të dua”, kompozitor i së cilës këngë është kantautori tashmë i mirënjohur Korab Shaqiri dhe tekstshkrues i madhi Ilir Shaqiri. Kënga është duke u mirëpritur nga publiku, gjë që përbën një motiv shtesë për të vazhduar më tutje.


- Meqë jetoni e veproni në Zvicër, e keni të vështirë të jeni pjesëmarrës gjithandej ku ka organizime?

Viktori: Po, është shumë e vështirë. Fakti që nuk jetoj në Kosovë, m’i vështirëson gjërat për të qenë i pranishëm e aktual në media dhe në mbrëmje rinore gjithandej. Por në kohë pushimesh mundohem që kohë pas kohe të jem i pranishëm aty ku po ka mundësi. Kuptohet, çdo fillim i ka ato vështirësitë e veta, po më kalimin e kohës besoj se tejkalohen të gjitha.


- Hëpërhë jeni duke përgatitur ndonjë këngë të re?

Viktori: Jam duke përgatitur një këngë të re dhe jam duke punuar për të realizuar edhe albumin tim të parë, të cilin mendoj ta plasoj në tregun muzikor gjatë kësaj vere.


- Keni planifikuar të merrni pjesë në ndonjë festival, për t’u promovuar dhe për të qenë më afër publikut shqiptar?

Viktori: Kam planifikuar të marr pjesë në “Kënga Magjike” dhe në “Top Fest 7”, ndërkohë i kam porositur dy këngë për këto festivale.

-Fare në fund?

Viktori: Fillimisht, falënderoja redaksinë e kombëtares “Bota sot”, që po më mundëson të jem në faqet e saj, gjithashtu falënderoj publikun nga i cili pres të kem një përkrahje edhe më të madhe për të më motivuar akoma më shumë për punën e mëtutjeshme.