Kriza ekonomike çon meshkujt drejt terapisë, gratë drejt çantave

Dëshira për të shfaqur një çantë të re në çdo rast është duke mbrojtur tregjet e sendeve të luksit e të lëkurës nga kriza ekonomike teksa gratë duken më konstante në shpenzimet e tyre sesa burrat. Firmat e çantave Louis Vuitton dhe Hermes janë nga produktet e luksit më të kërkuara, në krahasim me orët që tradicionalisht është sektori i burrave. Ekspertja e marketingut të dy gjinive Diana Jaffe thotë se pasiguria për vendet e punës e shkaktuar nga rrënimi ekonomik po kërcënon identitetin e burrave, duke i detyruar ata të shkurtojnë shpenzimet e tyre. Ndërkohë, gratë po marrin hapa për të përmirësuar humorin e tyre me pazare delikate.

"Gratë gjithashtu janë të shqetësuara për vendet e punës, por jo në gradën në të cilën burrat ndjehen të kërcënuar në identitetin e tyre si meshkuj",- thotë Jaffe.

Burrat kanë filluar të anulojnë shpenzimet e tyre në sende qejfi që në këto kohë të vështira mund të klasifikohen si pa shije, kurse të tjerë thjesht nuk kanë fuqinë për të menduar për të blerë objekte luksi,- thotë Jaffe."Shumë menaxherë meshkuj po vuajnë nga humbje e rëndë e statusit, shumë ndjehen nën një presion të pamasë ose vuajnë nga mbi-konsumimi. Ata nuk kanë më burimet për t'u përballur me shpenzime të mëtejshme dhe vendosin t'i drejtohen psikologëve të jetës", thotë ajo.

Bankat, siguruesit dhe menaxherët e aseteve kanë zhdukur rreth 400,000 vende pune në të gjithë botën që prej fillimit të krizës së kreditit në gusht 2007, duke goditur edhe shitësit me pakicë që kujdeseshin për lodrat luksoze delikate të kësaj klase.

Eksportet e orëve zvicerane kanë rënë me 26 për qind në gjysmën e parë të këtij viti dhe industria po përballet me rënien më të rëndë të kërkesës në 20 vjet, kurse grupi francez i sendeve luksoze Hermes raportoi një rënie prej 28 për qind në shitjet e gjysmës së parë të vitit për sektorin e sendeve të lëkurës.

Gratë kanë qenë disi më të stërvitura për rënien ekonomike dhe janë përballur më mirë me anën psikologjike të saj, thotë Eva Kreienkamp, drejtoreshë e marketingut të agjencisë FrischCo. "Burrat preken më shumë psikologjikisht nga kriza sesa gratë. Një çantë grash mund të blihet me një impuls të thjeshtë, kurse bizhuteritë ose orët jo",- thotë Armando Branchini, sekretar i përgjithshëm i shoqatës italiane të sendeve të luksit Altagamma.