“Machiato Band” me album të parë

Videoklipi i këngës “Më mirë”, i cili tashmë është lansuar në televizione, është pjesë e albumit të “Machiato Band. Videoklipi është punuar nga “Video Art” në Gjilan, ndërsa kënga ëhtë punuar nga vetë grupi “Machiato records”. “Është një klip shumë i mirë, i punuar verës, por që ka dalë qëllimisht këto ditë, pasi kemi dashur që publikut t’ia sjellim verën në dimër”, është shprehur një anëtar i grupit. Djemtë kanë realizuar edhe albumin e parë të tyre, i cili ka 11 këngë, dy bashkëpunime, një me Danin dhe një duet me Genc Prelvukajn. Ky album është bërë me qëllim që grupi të ketë albumin e tij të parë, pasi mendojnë se përmes tij grupi identifikohet si grup më shumë. “Që 7 vjet funksionon grupi dhe për ne nuk janë pak, pasi raportet e mira në mes të anëtarëve të grupit kanë qenë gjithnjë. Kemi vazhduar dhe vazhdojmë të kemi raporte të mira, që e tregojnë edhe vitet e bashkëpunimit. Madje tani jemi shtuar edhe me një anëtar”, rrëfejnë ata, duke shtuar se përparësia e grupit të tyre është se këngët i bëjnë vetë, ndërsa tekstet i bëjnë tekstshkrues të ndryshëm.

Djemtë të gjithë janë të diplomuar për muzikë, vetëm një prej tyre është ekonomistit. Bashkëpunimi me Danin “Nga jugu në veri” sipas tyre është një këngë që ka rezultuar e suksesshme. Ndërkaq kënga ”Fustani” me Hekuran Krasniqin, sikur thonë, përbëjnë dy këngët më të njohura të tyre.

Këndimi ‘lve’

“Publiku do të dëgjojë diçka gjallë, pasi është ngopur nga koncertet e mbrëmjet e këngëtarëve e CD, prandaj ne bëjmë dhe ndihemi mirë kur këndojmë gjallë”, thonë djemtë e grupit, duke e konsideruar këtë si përparësi. Dhe sigurisht që është e tillë. Projekti i tyre i ri është një bashkëpunim tjetër, që, sikur thonë, do të jetë një befasi e këndshme për publikun. Sa i përket stilit, ata çdoherë përpiqen të veçohen nga këngëtarët e tjerë, për të qenë më të veçantë në skenën e muzikës shqiptare. “Po mundohemi të bëjmë muzikë sa më natyrale dhe sa më ballkanike”, theksojnë ata.