Sot prezantohet dokumentari “Shpëtimi në Shqipëri”

Me rastin e ditës ndërkombëtare të Holokaustit dy producentët shqiptarë do të prezantojnë një dokumentar në tiranë dhe Nju Jork.

Dy producentët nga Kosova, Dardan Islami dhe Alush Gashi, do të prezantojnë sot dokumentarin e tyre dedikuar mikpritjes shqiptare gjatë Luftës së Dytë Botërore që i bënë hebrenjve nga persekutimi nazist. Titulluar “Shpëtimi në Shqipëri”, dokumentari do të shfaqet në Tiranë dhe Nju Jork dhe Uashington, për të prezantuar para botës vlerat e popullit shqiptar. Dy producentët e mirënjohur kanë punuar rreth dy vjet për këtë dokumentar në arkivat e Izraelit, Amerikës, Shqipërisë dhe Kosovës, punë që do të finalizohet edhe në kinematë e mësipërme.

Një rrëfim që vjen përmes disa personazheve, të cilët tregojnë sesi, jo vetëm qytetarët e thjeshtë, por edhe institucionet e ndryshme shqiptare, vet Mbreti Zog, ndihmuan në shpëtimin e tyre. Shqipëria është i vetmi vend në Evropë, e cila nuk persekutoi apo përndoqi hebrenjtë, madje ai pajisi ata me shtetësinë shqiptare për t’i mbrojtur nga ligjet raciale të Hitlerit. Pikërisht këto vlera të panjohura në sytë e botës sjellë dokumentari i Islamit dhe Gashit në këtë ditë domethënëse.

Ata kanë përzgjedhur pikërisht Ditën e Holokaustit që mesazhi që përçohet të jetë më i fortë dhe të dëgjohet. Sepse në një ditë si kjo vlen të vlerësohet vendi ynë, sepse në një nga zhvillimet më tragjike në historinë e njerëzimit, Holokaustit, shqiptarët dolën krenarë, pasi nuk morën pjesë në këtë proces barbar. Shqiptarët i trajtuan dhe i mbrojtën anëtarët e komunitetit hebre në Shqipëri, njësoj sikundër t'i kishin anëtarë të familjeve të tyre, duke vënë para çdo gjëje tjetër virtytin e tyre, besën, por edhe të tolerancës fetare dhe atë ndëretnike që karakterizon kombin tone.