Berisha: KE i dha një goditje të rëndë opozitës antishqiptare

Tiranë, 27 janar - Kryeministri Sali Berisha deklaroi sot në mbledhjen e radhës të qeverisë se Asambleja Parlamentare e Këshillit të Evropës me pranimin e kredencialeve shqiptare i ka dhënë goditje fatale politikës së bojkotit të ndjekur nga opozita shqiptare. Berisha e cilësoi letrën e Arta Dades drejtuar KE-së si “antishqiptare”. “KE i dha një goditje të merituar bojkotit. Kërkesa e PS-së është e dënueshme dhe antishqiptare” - deklaroi Berisha në mbledhjen e qeverisë. Kryeministri u shpreh se emërimi i Kastriot Islamit si anëtar të Asamblesë, u bë pasi ishte i vetmi në këtë forcë politike që kishte mandatin e Asamblesë.

Duke e quajtur si akt “të paprecedentë”, sipas kryeministrit, KE i dha një goditje të merituar bojkotit të PS. “Demokracia nuk shpërblen bojkotin. Partia Socialiste të shprehë ndjesën e saj për situatën e krijuar. U bëj thirrje deputetëve socialist të kthehen përfundimisht në parlament”- deklaroi më tej, shefi i qeverisë, Sali Berisha. Asamblesë Parlamentare e Këshillit të Evropës i ka dha fund dje vendimit për të pezulluar përkohësisht të drejtën e votës të delegacionit parlamentar të Shqipërisë. Komisioni i Rregullores së Këshillit Evropian, në mbledhjen e zhvilluar paraditen e djeshme vlerësoi se, “nuk ka mungesë balance në delegacionin shqiptar. Kuvendi i Shqipërisë nuk ka shkelur kërkesat e Rregullores së Asamblesë Parlamentare. Për këtë arsye, u vendos unanimisht të ratifikohen kredencialet e delegacionit të Shqipërisë”.