Gjykata rrëzon marrëveshjen me Greqinë

Gjykata Kushtetuese e Shqipërisë ka marrë vendim që të rishikohet marrëveshja e kufirit detar mes Shqipërisë dhe Greqisë.

Marrëveshja u nënshkruar në Tiranë në mes të vitit 2009, por kritikët e saj thonë se thonë se ajo është negociuar në dëm të interesave të vendit.

Autoritetet i kanë mohuar si të pathemelta kundërshtimet.

Marrëveshja ende nuk ka hyrë në fuqi pasi pritej ratifikimi nga parlamenti.

Vendimi i Gjykatës Kushtetuese duket se e rikthen procesin e negociatave nga e para, por ende nuk është e qartë procedura që duhet ndjekur.

Kritika

Vendimi ende nuk është publikuar, por gjykata nuk e ka përgënjeshtruar lajmin e bujshëm për rrëzimin e marrëveshjes së kufirit detar mes Shqipërisë dhe Greqisë.

Çështja u dërgua në Gjykatë nga Partia Socialiste në opozitë.

Një pjesë e shtypit, disa ekspertë të fushës, politikanë të ndryshëm dhe opozita në përgjithësi bënë një fushatë disa mujore kundër mënyrës se si ishte negociuar marrëveshja me Greqinë.

Ata ishin sidomos kundër përmbajtjes së saj, që, sipas tyre, shkonte në dëm të interesave kombëtare të Shqipërisë.

Negociatat ndërshtetërore zgjatën rreth dy vjet për të përfunduar në Tiranë në muajin maj të vitit të kaluar me nënshkrimin e dy ministrave të jashtëm respektivë.