A njeh dashuria ngjyrë, moshë dhe atdhe?

Edhe pse në pamje të parë duket një pyetje mjaft e lehtë, realiteti e përgënjeshtron plotsisht. Dashuria është një ndjenjë që buron spontanisht pa e programuar, aty pikërisht lind dhe mëdyshja për të dhënë një përgjigje të prerë.

Por jo gjithëmonë dashuria mbizotëron logjikën. Të mohosh një ndjenjë për shkak të ngjyrës, moshës ose atdheut, nuk do të thotë se tregon racizëm ose dashuria që ndjen për njeriun që ke përballë nuk është aq e fortë saqë të mos marrësh parasysh faktorët e lartëpërmendur. Ndoshta nga disa mund të konsiderohet dashuri robote, që do të thotë se komandohet plotsisht nga logjika.

Por, jo realiteti është krejt i ndryshëm. Cili prej nesh nuk ka ndjerë një lloj përbuzje kur ka parë të shoqëruar një të bardhë me një me ngjyrë, dhe nuk flasë vetëm për zezakët por akoma dhe romët? Menjëherë i kemi paragjykuar, madje jo rrallë herë kemi menduar se diçka nuk shkon mirë me personalitetin e tyre. Dhe kjo gjë ndodh sepse në kulturën tonë shqiptare, janë shumë të rralla martesat midis personave me ngjyra të ndryshme. Ndoshta, pas disa vitesh, brezat e rinj bëjnë një revolucion në këtë këndvështrim.

Ndërsa për sa i përket diferencës së moshës, qëndrimi ynë deri diku është më elastik. E theksoj deri diku, pasi një pjesë e meshkujve nuk dëshiron të shikojë seriozisht një lidhje dashurie, nëse femra është me e madhe se ata. Në qoftë se femra është më e vogël, e konsiderojnë mëse normale. Me pak fjalë në shoqërinë shqiptare është i pranueshëm fakti që një dyzetë vjeçar të martohet me një vajzë njëzetë e pesë vjeçare. Sigurisht që dashuria është një çështje personale, dhe të gjithë ne që ndodhemi jashtë këtij rrethi jemi të fundit të cilët do të vendosim për fatin e tyre.

Madje personalisht mendoj se një diferencë moshe 10 - 15 vjet midis dy personave që duhen, është mjaft interesante. Nga një njeri më i madh, ke mundësinë të mësosh më shumë, dhe nuk dua të përkufizohem vetëm në aspektin erotik, por më shumë në atë jetësor. A njeh dashuria atdhe? Për mendimin tim, nuk njeh ATDHE dhe KUFIJ. Nëse me dikë gjen të njëjtin kod komunikimi, problemi i nacionalitetit eshte MIKROSKOPIK, për të mos thënë INEKZISTENT.