Shpresojnë në rezultate të mira

Zyrtarët e Federatës së Mundjes të Kosovës janë optimist se do të arrijnë rezultate të mira në turneun ndërkombëtar “Hubert Flatz” në mundje, që mbahet nga data 4-6 shkurt në Wolfurt të Austrisë. Kryetari i FMK-së, Naim Muja, tha se është njëri prej turneve më të rëndësishme për juniorë që organizohet në Austri dhe çdo rezultat i favorshëm që arrihet do të jetë shumë i rëndësishëm për mundjen e Kosovës. Sekretari i përgjithshëm i FMK-së njëherësh edhe përzgjedhës i kombëtares së Kosovës, Sylejman Shala, tha se turneu është në kalendarin e Federatës Ndërkombëtare të Mundjes dhe ka rëndësi të veçantë. ‘Në turneun në Austri marrim pjesë me ftesë të Federatës Ndërkombëtare të Mundjes (FILA), për çka edhe është turne zyrtarë dhe çdo rezultat i arritur ngrit edhe pikë për mundjen e Kosovës.

Besojmë se do të shënojmë rezultate të mira megjithëse jemi të vetëdijshëm se bëhet fjalë për një turne shumë të fortë”, tha Shala. Sipas tij, ekspedita e kombëtares së Kosovës për juniorë ishte paraparë t’i ketë gjashtë mundës, por vetëm pesë do të jenë prej tyre. “Mundësi Kenan Daci është vonuar që të aplikojë për vizë në ambasadën austriake dhe është i vetmi që do të mungojë. Pesë garues të tjerë që përfaqësojnë Kosovën në Austri janë: Kastriot Sedolli (55 kg), Pajtim Shala (66 kg), Bajram Shala (77 kg), Edon Shala (84 kg) e Egzon Shala (96 kg). Mendoj se të gjithë këta të përzgjedhur për këtë turne janë të përgatitur mirë dhe që premtojnë rezultate”, theksoi Shala. Zyrtarët e FMK-së shpresojnë që se shpejti do të fitojnë edhe dy-tri bursa olimpike, që sipas tyre, të gjitha do të varen nga rezultatet që do të arrijnë në garat zyrtare ndërkombëtare. Muja tha se pret brenda një kohe të shkurtër që të jenë edhe anëtar me drejta të plota në FILA.

“Besojmë se shpejti të jemi të anëtarësuar në FILA me drejta të plota dhe jo sikur jemi deri tash me kushtëzime”, tha Muja. Këshilltari për sport i ministrit, Valton Beqiri, Muharrem Sahiti, shkuarjen e mundësve në turneun ndërkombëtar e vlerësojë si të rëndësishme dhe është i bindur se nuk do të mungojnë rezultatet. Mundësi Egzon Shala, tha se janë të përgatitur në të gjitha pikëpamjet dhe presin medalje. “Në përgjithësi jemi të gatshëm dhe besojmë në rezultate të mëdha që do të shënojmë në Austri”, tha Shala.