Bullgaria me 17 shkurt në Prishtinë, në dyshim Italia

Përzgjedhësi i kombëtares së Kosovës në konkurrencën e meshkujve, Alfred Llazari, në emërore përveç hendbollistëve nga Kampionati i Kosovës do të llogaritë edhe ata që luajnë jashtë Kosovës.

Kreu i Federatës së Hendbollit të Kosovës njofton se me 17 shkurt, me rastin e ditës së shpalljes së Pavarësisë së Republikës së Kosovës, kombëtarja e Kosovës në konkurrencën e femrave, do të zhvillojë ndeshje miqësore ndërkombëtare me kombëtaren A të Bullgarisë. “Zyrtarët e Federatës së Hendbollit të Bullgarisë e kanë konfirmuar ardhjen e kombëtares së Bullgarisë për ta zhvilluar ndeshjen revyale”, thuhet në njoftimin e FHK-së. Përzgjedhësi prof. Ismet Jupa se shpejti do të bëj të ditur edhe emëroren e kombëtares së Kosovës që do të përballet me bullgaret. Se shpejti do të mësohet se në cilën palestër do të zhvillohet ndeshja dhe sa ora fillon. “Ky takim ka ardhur pas kontakteve të drejtpërdrejta që patën kreu i FHK-së Mexhit Devaja dhe Izet Gjinovci gjatë zhvillimit të kampionatit evropian për meshkuj në Vjenë të Austrisë fundjavën që lamë pas. Përzgjedhësi i kombëtares së Kosovës (femrat), Ismet Jupa, tha se kjo do të jetë edhe ndeshja e parë zyrtare për të që sa është emëruar përzgjedhës i kësaj kombëtare. “Ballafaqimi me Bullgarinë është ndeshje e rëndësisë së madhe dhe për shumë arsye. Është ndeshja e parë zyrtare për mua që sa jem përzgjedhës i kombëtares së Kosovës. Rëndësia tjetër është se kjo ndeshje revyale ndërkombëtare do të zhvillohet për nder të Pavarësisë së Republikës së Kosovës. Kemi planifikuar t’i zhvillojmë edhe pesë-gjashtë ditë përgatitje të përbashkëta me kombëtaren dhe të shohim formën e secilës hendbolliste.

Është paraparë të punojmë dy herë në ditë, vetëm mbetet të dihet se në cilën ditë do të tubohemi. Do të bazohem më shumë në hendbollistet që janë më të përgatitura, për arsye se disa nga klubet ende nuk i kanë nisur edhe stërvitjet për stinorin pranveror. Përbërjen e kombëtares së Kosovës do të kompozohet 50 për qind me hendbolliste me përvojë dhe 50 për qind me hendbolliste që janë perspektiv e këtij sporti”, tha Jupa. Ai shtoi: “Nuk kam njohuri aq shumë për kombëtaren e Bullgarisë, përveç që kam informacione nëpërmjet shtypit. Nuk është kombëtare aq e fortë sikurse që janë ato të rajonit, Kroacia etj. por nuk duhet nënçmuar, por të jemi të kujdesshëm”. Po ashtu FHK-ja parimisht kontraktuan edhe një ndeshje të Përfaqësueses së meshkujve me kombëtaren e Italisë, por kjo pritet që të zyrtarizohet përfundimisht brenda dy-tri ditëve, sepse sipas presidentit të Federatës të Hendbollit të Italisë Francesko Purramuto duhet ndryshuar termini i zhvillimit të garave në Kampionatin italian, në mënyrë që kombëtarja italiane të zbarkon më 17 shkurt në Prishtinë”, njoftojnë nga zyra e FHK-së. Sipas përzgjedhësit Alfred Llazari, kjo do të ishte një sprovë e re për kombëtaren e rinovuar të Kosovës. Ai në emërore përveç hendbollistëve nga Kampionati i Kosovës do të gjenden edhe ata që luajnë në klubet e shteteve të tjera, si: Besfort Bilalli, Alban Bislimi, Valon Dedaj, Fatlum Ahmetaj, Muhamed Maloku, Arbër Qerimi dhe Besnik Shala.