Muriqi kryqëzon dorëzat në muajin mars?

Boksieri i mirënjohur, Elvir Muriqi është duke u përgatitur me intensitet të lartë që të jetë sa më i gatshëm për sfidat e radhës që e presin në muajin mars. Boksieri pejan që dëshmohet në boksin profesionist premton se do t’i kënaq me boks cilësorë dhe fitore adhuruesit kudo që janë shqiptar. Elvir Muriqi do të ketë meçin e parë këtë vit në muajin mars? Muriqi 37-5 (23 KO) ka kohë që është në biseda me boksierin perspektiv amerikan, Marcus Oliveira 19-0 (17 KO) dhe brenda kësaj jave mund të nënshkruhet marrëveshja dhe meçi do të zhvillohet sipas të gjitha gjasave në qytetin e lotarisë, Las Vegas, bëhet e ditur nga uebfaqja KosovaBoxing.org.

Elvir Muriqi ditë më parë ka marrë edhe një ofertë nga promotori i njohur turk, Ahmet Oner i cili është pronar i ekipit të njohur Arena Box Promotion për një meç të mundshëm në Hamburg të Gjermanisë me 27 mars dhe nëse dështojnë bisedimet me Oliveira atëherë boksieri ynë do të paraqitet në Hamburg. “Meçi im i radhës është shumë i rëndësishëm. Kam pritur që do të luftoj për titull bote, por për momentin kjo është e vështirë. Lufta me Oliveira ka peshë të madhe sepse do të jetë për titullin “NBFA – National Boxing Federation Assosiation” që do të thotë kush fiton bëhet kampion i Amerikës”, tha Muriqi. Ditë më parë ranglistat botërore te disa versione janë shfaqur se boksieri ynë Elvir Muriqi ka përparuar në versionin WBC-së ku ishte i 14-ti, kurse këtë muaj ka përparuar për dy vende, tani gjendet në pozitën e 12-të në versionin WBC. Muriqi ka synim të ngjitet sa më lartë në renditje dhe ka besim se këtë gjë do të bëj duke u bazuar në punën që është duke bërë dhe cilësinë e tij.

Boksieri i cili mund të jetë kundërshtar i boksierit tonë, Marcus Oliveira renditet si i 14 në WBA. “Shpresoj të takohem me Oliveira, mirëpo nuk brengosem edhe shumë, sepse e kam edhe ofertën tjetër për në Gjermani. Nëse boksoj në Gjermani nuk do të kam ndonjë kundërshtar të fortë si të kalibrit botërorë siç është Oliveira, mirëpo e mira e kësaj është se unë do t`a mbaj formën dhe të përparoj në renditjet botërore në të gjitha versionet. Po ashtu është kënaqësi e imja të boksoj në Gjermani ku nuk kam boksuar asnjëherë dhe e di se do të kam përkrahjen në maksimum nga bashkatdhetarët e mi shqiptar atje”- tha Elvir Muriqi.