Çifti Ilire&Lirak Çela për Shën Valentinin!

Festa e Shën Valentinit, një festë e jona apo jo, dosido festohet edhe tek ne. 14 Shkurti, një datë kjo që ka filluar të festohet me të madhe, u sjell ndër mend njerëzve se ata janë afër të dashurve të tyre. Të gjithë mendojnë se shprehja e dashurisë vetëm në këtë ditë nuk do të ishte aspak e vlefshme, mirëpo shumë pajtohen e se pse të mos i bëjnë të ndjehen mirë të dashurit e tyre edhe në këtë ditë. Ka ca prej tyre që dhuratat nuk i ruajnë vetëm për 14 Shkurt, por shkëmbejnë gjatë gjithë vitit, marrin dhe japin të tilla. Kështu vepron edhe çifti i aktorëve Ilire Vinca dhe Lirak Çela. Një çift ky i cilësuar nga njerëzit si shumë i mirë, i suksesshëm dhe gjithashtu me familje të shëndoshë.

Ilirja më tolerante

Ilirja nuk brengoset shumë se a do të blejë Liraku dhuratë për Shën Valentin apo jo. Është mësuar me natyrën e tij dhe tashmë e di se Liraku edhe mund të harrojë ndonjë datë të rëndësishme. Pavarësisht se ai shpeshherë i sjellë dhurata asaj, sidomos kur është jashtë vendit. Madje, sikur ka treguar Ilirja, po qe se Liraku do të shtonte kujdesin ndaj saj, ajo do të kishte filluar të shqetësohej, meqë tashmë e njeh mirë personalitetin e burrit të saj. Kjo aspak s’ka rëndësi për çiftin, meqë tashmë janë aq stabil, aq të fortë dhe më të dashuruar se kurrë. Me dy fëmijë që kanë, ata bëjnë një jetë shumë të lumtur. Sipas Ilires çështja e kujdesit të meshkujve është çështje e personalitetit. Në përgjithësi, sipas saj, shumicës së meshkujve nuk u kujtohen shumë datat e rëndësishme, pasi këtë e bën vetë natyra e tyre. Ndërsa femrat janë ato që janë më romantike, më të ndjeshme dhe më të kujdesshme ndaj datave të caktuara në çifte. “Unë mendoj se femra duhet të jetë më tolerante, pasi natyra e saj është e tillë. Nuk është në natyrën e femrës të jetë e egër, është atribut femëror toleranca dhe femra e mençur e di si të sillet në momente të ndryshme”, ka thënë Ilirja, duke shtuar se në raportin e një çifti gjithsesi duhet të ketë respekt të ndërsjellë për të qenë një lidhje e gjatë dhe e shëndoshë. Si duket çifti e ka gjetur me kohë çelësin e lumturisë.

Liraku: Me Iliren kemi me të njëjta

Duke qenë kështu Lirak Çela ka thënë se më shumë i pëlqen t’i dhurojë ndonjë dhuratë Ilires gjatë vitit, por jo domosdoshmërisht vetëm në këtë festë. “Ne meshkujt mbase jemi më pak të kujdesshëm, jo pse nuk i duam gratë tona”, ka thënë ai, duke shtuar se kryesorja është dashuria që i bën njerëzit bashkë. “Gjithashtu për të qenë dy veta bashkë duhet të jenë të afërt në botëkuptime, të një kulture të përafërt, pastaj duhet të jenë tolerantë, të dinë si t’i menaxhojnë krizat në çift për hirë të një bashkëjetese të mirëfilltë”, ka thënë Liraku, ndërsa ka shtuar: “Unë besoj se jemi gjetur shumë mirë me njëri-tjetrin, kemi bindje njësoj, edhe sa i përket dhuratave, kjo e di që unë jam i tillë dhe jo që nuk blej dhurata për shkak të ndonjë arsyeje tjetër”.